ସମ୍ବଲପୁର : ସମ୍ବଲପୁରରେ 12 ଘଣ୍ଟିଆ ବନ୍ଦ ଡାକରା । ସମ୍ବଲପୁର ନାଗରିକ କ୍ରିୟାନୁଷ୍ଠାନ କମିଟି ପକ୍ଷରୁ ଦିଆଯାଇଛି ବନ୍ଦ ଡାକରା । ସ୍ୱତନ୍ତ୍ର ରାଜ୍ୟ ଗଠନ ଦାବି ଓ ପଶ୍ଚିମ ଓଡ଼ିଶାରେ ହାଇକୋର୍ଟର ସ୍ଥାୟୀ ବେଞ୍ଚ ପ୍ରତିଷ୍ଠା ତଥା ଅନ୍ୟାନ୍ୟ ଦାବିକୁ ନେଇ ଆଜି 12 ଘଣ୍ଟିଆ ସମ୍ବଲପୁର ବନ୍ଦ ଡାକରା ଦିଆଯାଇଥିଲା । ଏହାର ପ୍ରଭାବରେ ସମ୍ବଲପୁରର ସମସ୍ତ ସରକାରୀ କାର୍ଯ୍ୟାଳୟ, କୋର୍ଟ, କଚେରୀ, ଦୋକାନ ବଜାର ବନ୍ଦ ରହିଥିବା ଦେଖିବାକୁ ମିଳିଛି । ତେବେ ଏହି ବନ୍ଦ ଡାକରାରେ ସ୍କୁଲ, କଲେଜ ଓ ଅତ୍ୟାବଶ୍ୟକ ସେବାକୁ ବାଦ୍ ଦିଆଯାଇଛି ।
ମୁଖ୍ୟତଃ ସ୍ଵତନ୍ତ୍ର ରାଜ୍ୟ ଗଠନ ଦାବି, ପଶ୍ଚିମ ଓଡ଼ିଶାରେ ହାଇକୋର୍ଟର ସ୍ଥାୟୀ ବେଞ୍ଚ ସ୍ଥାପନ, ସମ୍ବଲପୁରୀ ଭାଷାକୁ ସମ୍ବିଧାନର ଅଷ୍ଟମ ଅନୁଛେଦରେ ସାମିଲ, ସ୍ମାର୍ଟ ଇଲେକ୍ଟ୍ରିକ ପ୍ରିପେଡ ମିଟର ପ୍ରଚଳନକୁ ବିରୋଧ ଓ ପ୍ରିପେଡ ପାଣି ମିଟର ପ୍ରଚଳନକୁ ବିରୋଧ କରି ଆଜି ବନ୍ଦ ପାଳନ ହୋଇଛି । ସୂଚନାନୁସାରେ ପୂର୍ବରୁ ସମ୍ବଲପୁର ଜିଲ୍ଲା ଓକିଲ ସଂଘ ପକ୍ଷରୁ ହାଇକୋର୍ଟ ବେଞ୍ଚ ପ୍ରତିଷ୍ଠା ନେଇ ଦୀର୍ଘ ଦିନରୁ ଆନ୍ଦୋଳନ ହେଇଆସୁଛି ।
ଏନେଇ ରାଜ୍ୟସରକାର କୌଣସି ପଦକ୍ଷେପ ନନେବାରୁ ଆଜି ସମ୍ବଲପୁର ଜିଲ୍ଲା ନାଗରିକ କ୍ରିୟାନୁଷ୍ଠାନ କମିଟି ପକ୍ଷରୁ 5ଦଫା ଦାବି ନେଇ 12 ଘଣ୍ଟିଆ ବନ୍ଦ ଡାକରା ଦେଇଥିଲା । ଏହି ବନ୍ଦ ଡାକରାରେ ସମ୍ବଲପୁର ନାଗରିକ କ୍ରିୟାନୁଷ୍ଠାନ କମିଟିର ସଦସ୍ୟ ସମ୍ବଲପୁରର ଧନୁପାଲି ଛକ, ଅଇଁଠାପାଲିରେ ପିକେଟିଂ କରିଥିଲେ ।
ଏହାସହ ସମ୍ବଲପୁର କଚେରୀ ଛକରେ କମିଟିର ସଦସ୍ୟମାନେ ଧାରଣାରେ ବସିଥିଲେ । କୋର୍ଟକୁ ଯାଉଥିବା ବେଳେ ବିଚାରପତିଙ୍କୁ ଅଟକାଇ ଫେରେଇ ଦିଆଯାଇଥିଲା । ଏହି ଆନ୍ଦୋଳନକୁ ଆଗାମୀ ଦିନରେ ଆହୁରି ତୀବ୍ରତର କରାଯିବ ବୋଲି ନାଗରିକ କ୍ରିୟାନୁଷ୍ଠାନ କମିଟି ପକ୍ଷରୁ କୁହାଯାଇଛି ।
ଇଟିଭି ଭାରତ, ସମ୍ବଲପୁର
