ସମ୍ବଲପୁର: ସମ୍ବଲପୁରର ଅଧିଷ୍ଠାତ୍ରୀ ଦେବୀ ମାଆ ସମଲେଶ୍ୱରୀଙ୍କ ପୀଠର ସୌନ୍ଦର୍ଯ୍ୟକରଣ ପାଇଁ ରାଜ୍ୟ ସରକାର ‘ସମଲେଇ ଯୋଜନା’ ଜାରି ରଖିଛନ୍ତି । ଏହି ଯୋଜନାର ଅଗ୍ରଗତି ପରଖିବା ପାଇଁ ମୁଖ୍ୟ ଶାସନ ସଚିବ ତଥା 5T ସଚିବ ମଝି ମଝିରେ ସମ୍ବଲପୁର ଆସି ଏହି ପ୍ରକଳ୍ପର ଅବଲୋକନ କରି ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀଙ୍କ ସହ ସମୀକ୍ଷା କରି ଯାଉଛନ୍ତି । ଯୋଜନାରେ ବିସ୍ଥାପିତ ପରିବାର ଗୁଡିକୁ ଉଚିତ କ୍ଷତିପୂରଣ ତଥା ଥଇଥାନର ସବୁ ବ୍ୟବସ୍ଥା କରାଯାଇଥିବାର ଜିଲ୍ଲା ପ୍ରଶାସନ ପକ୍ଷରୁ ଘୋଷଣା ହୋଇସାରିଛି । ତେବେ ସମଲେଶ୍ୱରୀ ମନ୍ଦିର ନିକଟରେ ଥିବା ଘୁନଘୁଟି ପଡାର ଅଧିକାଂଶ ପରିବାର ଏହି ବିସ୍ଥାପନକୁ ବିରୋଧ କରି ଆସୁଛନ୍ତି ।
ମଙ୍ଗଳବାର ସମ୍ବଲପୁର ଜିଲ୍ଲା ପ୍ରଶାସନ ପକ୍ଷରୁ ଘୁନୁଘୁଟିପଡାର କେତେକ ଘର ଉଚ୍ଛେଦ କରାଯାଉଥିବା ବେଳେ ସ୍ଥାନୀୟ ବିସ୍ଥାପିତ ପରିବାର ସବୁ ଏହାକୁ ବିରୋଧ କରିଥିଲେ । ଜିଲ୍ଲା ପ୍ରଶାସନ ଓ ପୋଲିସ ପକ୍ଷରୁ ବୁଝାସୁଝା କଲା ପରେ ମଧ୍ୟ ଲୋକେ ବୁଝିନଥିଲେ ଓ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ ।
ସମଲେଇ ଯୋଜନାର ବିସ୍ଥାପିତ ହେଉଥିବା କେତେକ ପରିବାରକୁ ବର୍ତ୍ତମାନ ସୁଦ୍ଧା ଜିଲ୍ଲା ପ୍ରଶାସନ ବୁଝେଇବାରେ ବିଫଳ ହୋଇଛି । ଗୋଟିଏ ପଟେ ସମଲେଇ ଯୋଜନା ପାଇଁ କାର୍ଯ୍ୟ ଜୋରସୋରରେ ଚାଲିଥିବା ବେଳେ ଅନ୍ୟପଟେ କେବଳ ଘୁନଘୁଟିପଡାରେ ବିସ୍ଥାପନକୁ ନେଇ ବିବାଦ ଦେଖାଯାଇଛି । ଏଠାରେ ଶହ ଶହ ବର୍ଷ ଧରି ରହି ଆସୁଥିବା ଦଳିତ ଶ୍ରେଣୀର ଲୋକଙ୍କ ସହ ଜିଲ୍ଲା ପ୍ରଶାସନ ଅନ୍ୟାୟ କରୁଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ । ଏଠାରୁ ବିସ୍ଥାପିତ ହେଉଥିବା 80ରୁ ଊର୍ଦ୍ଧ୍ବ ପରିବାରକୁ ଉଚିତ୍ କ୍ଷତିପୂରଣ ଦିଆଯାଉନଥିବା ଅଭିଯୋଗ କରିଛନ୍ତି ସ୍ଥାନୀୟ ଘୁନଘୁଟିପଡା ବାସୀ । ମଙ୍ଗଳବାର ଏହି ପ୍ରସଙ୍ଗ ନେଇ ସ୍ଥାନୀୟ ଲୋକେ ଭୀମ ଆର୍ମିର ନେତୃତ୍ୱରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ବିରୋଧୀ ନାରା ଦେଇଥିଲେ ।
