ସମ୍ବଲପୁର: ପ୍ରଭୁ ଶ୍ରୀରାମଙ୍କ ଲଙ୍କାକୁ ସେତୁ ବନ୍ଧ ବାନ୍ଧିବାରେ ମୁଖ୍ୟ ଭୂମିକା ନିଭାଇଥିଲେ ହନୁ ମାଙ୍କଡ଼ । ଦୁର୍ଦ୍ଦସାରେ ଫସି ରହିଥିବା ସୀତା ମାତାଙ୍କୁ ଉଦ୍ଧାର କରିବା ପାଇଁ ଆରମ୍ଭ କରିଥିଲେ ଅଭିଯାନ । କିନ୍ତୁ ଏଠାରେ ଚିତ୍ର ଟିକେ ଅଲଗା । ଶ୍ରୀରାମଙ୍କ ସୁରକ୍ଷା କବଚ ସାଜିଥିବା ହନୁ ନିଜେ ଫସିଯାଇଛନ୍ତି ଉଛୁଳା ନଦୀ ଭିତରେ । ଦ୍ବୀପ ସଦୃଶ ନଦୀ ମଝିରେ 30ରୁ ଉର୍ଦ୍ଧ୍ବ ମାଙ୍କଡ଼ ଜଳବନ୍ଦୀ ଅବସ୍ଥାରେ ଫସି ରହିଥିବା ବେଳେ ଡ଼ଙ୍ଗାର ସେତୁବନ୍ଧ ନିର୍ମାଣ କରି ଏମାନଙ୍କୁ ଉଦ୍ଧାର କରିଛନ୍ତି ହୁମା ଗ୍ରାମବାସୀ ।
ହୁମାର ପ୍ରସିଦ୍ଧ ବକ୍ର ମନ୍ଦିର ନିକଟରେ ଥିବା ମହାନଦୀ ଗର୍ଭରେ ରହିଛି ଏକ କାଳୀ ମନ୍ଦିର। ଏହା ଏକ ଦ୍ବୀପ ସଦୃଶ। ଗତ କିଛି ଦିନତଳେ ପାଖା ପାଖି 30 ଟି ମାଙ୍କଡ ସେଠାକୁ ଯାଇଥିଲେ। କିନ୍ତୁ ଲଗାଣ ବର୍ଷା ଲାଗି ରହିବାରୁ ଚତୁର୍ପାଶ୍ବ ହୋଇଯାଇଥିଲା ଜଳମଗ୍ନ । ଫଳରେ ମଝି ନଦୀରେ ଫସି ରହିଥିଲେ ଏହି ମାଙ୍କଡ଼ ଦଳ ।
ସେମାନେ ଅସହାୟ ଅବସ୍ଥାରେ ଜଳବନ୍ଦୀ ଭାବରେ ଦେଖିବାକୁ ପାଇଥିଲେ ଗ୍ରାମବାସୀ । ପରେ ସେମାନଙ୍କୁ ଉଦ୍ଧାର କରିବା ପାଇଁ ଆରମ୍ଭ କରିଦେଇଥିଲେ ପ୍ରୟାସ । ଦୁଇଟି ଡଙ୍ଗାକୁ ପ୍ରଖର ନଦୀ ଜଳ ମଧ୍ୟରେ ସେତୁ ଭଳି ରଖି ଫସି ରହିଥିବା ମାଙ୍କଡ଼ ମାନଙ୍କୁ ଉଦ୍ଧାର କରିଥିଲେ । ଗ୍ରାମବାସୀଙ୍କ ଏପରି ସାହାର୍ଯ୍ୟକୁ ସମସ୍ତେ ପ୍ରଶଂସା କରିଛନ୍ତି ।
ସମ୍ବଲପୁରରୁ ବାଦସାହା ଜୁସ୍ମନ ରଣା, ଇଟିଭି ଭାରତ
