ସମ୍ବଲପୁର: ଆସନ୍ତା ମେ’ 15ରୁ ସମ୍ବଲପୁରରେ ଆରମ୍ଭ ହେବ ଚଳିତବର୍ଷ ରବି ଋତୁର ଧାନ କ୍ରୟ ପ୍ରକ୍ରିୟା । ଡିଏଲପିସି ବୈଠକରେ ଏହି ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ । ଗତ ବର୍ଷ 14, 759 ଜଣ ଚାଷୀ ପଞ୍ଜିକରଣ କରିଥିବା ବେଳେ ଚଳିତ ବର୍ଷ ଧାନ ବିକ୍ରି ପାଇଁ 15,444 ଜଣ ଚାଷୀ ପଞ୍ଜିକରଣ କରିଛନ୍ତି । ଧାନ ବିକ୍ରି ସମୟରେ ଚାଷୀ କିପରି ଅସୁବିଧାର ସମ୍ମୁଖୀନ ନହେବ ସେନେଇ ବ୍ୟବସ୍ଥା କରାଯିବ ବୋଲି ଜିଲ୍ଲା ପ୍ରଶାସନ ସୂଚନା ଦେଇଛି ।
ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ଏଥର ସକାଳ 6 ଟାରୁ 10ଟା ଭିତରେ ଧାନ ସଂଗ୍ରହ କରିବାକୁ ଜିଲ୍ଲା ପ୍ରଶାସନ ନିଷ୍ପତ୍ତି ନେଇଛି । 2022-23 ରବି ଧାନ କ୍ରୟ ପାଇଁ 30ଟି ପ୍ୟାକ୍ସ, 10ଟି ମହିଳା ସ୍ୱୟଂ ସହାୟକ ଗୋଷ୍ଠୀ, 62 ପିପିସି ଏବଂ 46 ମିଲର ସାମିଲ ହେବେ ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦେଇଛି । 2021-22ରେ ସର୍ବନିମ୍ନ ସହାୟକ ମୂଲ୍ୟ ସାଧାରଣ ଧାନ କୁଇଣ୍ଟାଲ ପ୍ରତି 1940 ଟଙ୍କା ଥିବା ବେଳେ ଗ୍ରେଡ଼ ଏ ଧାନ ପାଇଁ 1960 ଟଙ୍କା ରହିଥିଲା । କିନ୍ତୁ 2022-23 ପାଇଁ ସର୍ବନିମ୍ନ ସହାୟକ ମୂଲ୍ୟ ସାଧାରଣ ଧାନ କୁଇଣ୍ଟାଲ ପ୍ରତି 2040 ଟଙ୍କା ଏବଂ ଗ୍ରେଡ଼ ଏ ଧାନ ପାଇଁ 2060 ଟଙ୍କା ରହିଛି । ଗ୍ରୀଷ୍ମ ପ୍ରବାହ ଯୋଗୁଁ ସକାଳ 6 ଟାରୁ 10ଟା ମଧ୍ୟରେ ଧାନ ସଂଗ୍ରହ ହେବ ।
