ସମ୍ବଲପୁର: ଅଇଁଠାପାଲି ଗଣଦୁଷ୍କର୍ମ ମାମଲାର ଅଭିଯୁକ୍ତଙ୍କ ବିରୋଧରେ ସମ୍ବଲପୁର ପୋଲିସ ଚାର୍ଜସିଟ ଦାଖଲ କରିଛି । ଅଭିଯୁକ୍ତଙ୍କ ବିରୋଧରେ ୨୦୫ ପୃଷ୍ଠାର ଚାର୍ଜସିଟ ଦାଖଲ କରାଯାଇଥିବା ନେଇ ପୋଲିସ ପକ୍ଷରୁ ସୂଚନା ଦିଆଯାଇଛି । ଘଟଣାକୁ ରେଡ ଫ୍ଲାଗ ଟ୍ୟାଗ ଯୁକ୍ତ କରାଯାଇଛି ।
ସେହିପରି ସମ୍ବଲପୁର ମଣ୍ତଳ କାରାଗାରରେ ଥିବା ଚାରି ଅଭିଯୁକ୍ତ ଓ ରାଉରକେଲା ସୁଧାର ଗୃହରେ ଥିବା ୨ ନାବାଳକ ଅଭିଯୁକ୍ତଙ୍କ ରକ୍ତ ନମୂନା ସଂଗ୍ରହ କରି ଡିଏନଏ ପ୍ରୋଫାଇଲିଙ୍ଗ ପାଇ ରାଜ୍ୟ ଫରେନସିକ ଲାବ୍ରୋଟାରୀକୁ ପଠାଯାଇଥିବା ଏସପି ସୂଚନା ଦେଇଛନ୍ତି ।
ସୂଚନାଯୋଗ୍ୟ, ଗତ ୭ ତାରିଖ ରାତିରେ ଅଇଁଠାପାଲି ଥାନା ଡେଙ୍ଗସରଙ୍ଗି ଅଞ୍ଚଳରେ ସ୍ବାମୀ ପରିତ୍ୟକ୍ତା ମହିଳାଙ୍କୁ ଲିଫ୍ଟ ଦେବା ବାହାନାରେ ଅପହରଣ କରାଯାଇ ଗଣଦୁଷ୍କର୍ମ କରାଯାଇଥିଲା । ଏହି ଘଟଣା ପରେ ଅଭିଯୁକ୍ତ ମାନେ ପୀଡିତାଙ୍କୁ ବରେଇପାଲି ନିକଟସ୍ଥ ଏକ ରାସ୍ତାକଡରେ ଫିଙ୍ଗି ଦେଇ ଚାଲି ଯାଇଥିଲେ । ଏହାପରେ ଗୁରୁତର ଅବସ୍ଥାରେ ସମ୍ବଲପୁର ପୋଲିସ ପୀଡିତାଙ୍କୁ ଉଦ୍ଧାର କରି ବୁର୍ଲା ଡାକ୍ତରଖାନାରେ ଭର୍ତ୍ତି କରିଥିଲା । ପ୍ରାୟ ୧୦ ଦିନର ଚିକିତ୍ସା ପରେ ଏବେ ପୀଡିତା ଜଣକ ସୁସ୍ଥ ରହିଛନ୍ତି । ମାମଲାର ବିଚାର ଜାରି ରହିଥିବାରୁ ପୀଡିତାଙ୍କୁ ସାକ୍ଷୀ ଷ୍ଟେ ହୋମରେ ରଖାଯାଇଛି। ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
