ସମ୍ବଲପୁର: ବାରହା ଆକ୍ରମଣରେ ୩ ଗୁରୁତର ଆହତ । ସମ୍ବଲପୁର ଜିଲ୍ଲା ଅନ୍ତର୍ଗତ ଜୁଜୁମୁରା ବ୍ଳକର କଂସର ପଞ୍ଚାୟତ ସାହାଜବାହାଲ ଗାଁରେ ବାରହା ଆକ୍ରମଣରେ ୩ ଜଣ ଗୁରୁତର ଆହତ ହୋଇଛନ୍ତି । ଆଜି ସକାଳୁ ପଡିଆବାହାଲ ବନ ବିଭାଗ ରେଞ୍ଜ ଅନ୍ତର୍ଗତ ସାହାଜବାହାଲ ଗାଁର ୩ଜଣ ବ୍ୟକ୍ତି ନିକଟସ୍ଥ ଜଙ୍ଗଲକୁ ଛେଳି ଚରାଇବାକୁ ଯାଇଥିବା ସମୟରେ ଏକ ବାରହା ଆକ୍ରମଣ କରିଥିଲା ।
ତେବେ ବାରହା ଆକ୍ରମଣରେ ସାହାଜବାହାଲ ଗାଁର ଅନିରୁଦ୍ଧ ଭୋଇ(୫୦), ମନୋଜ ଭୋଇ(୫୫) ଓ କପିଲ ଭୋଇ(୫୧) ଆହତ ହୋଇଛନ୍ତି । ସ୍ଥାନୀୟ ଲୋକେ ଆହତଙ୍କୁ ପ୍ରଥମେ ଜୁଜୁମୁରା ମେଡିକାଲକୁ ନେଇଥିଲେ । ତେବେ ଅବସ୍ଥା ଅଧିକ ଗୁରୁତର ହେବାରୁ ଆହତଙ୍କୁ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
