ସାଇବର ଠକେଇ: ବନକର୍ମଚାରୀଙ୍କ ଆକାଉଣ୍ଟରୁ 20 ହଜାର ଗାଏବ

ପୋଲିସ ପ୍ରଶାସନ ଓ ବ୍ୟାଙ୍କ ତରଫରୁ ବାରମ୍ବାର ସାଇବର ଠକେଇ ରୋକିବାକୁ ବିଭିନ୍ନ ପ୍ରୟାସ ଜାରି ରହିଛି । ହେଲେ ସମ୍ବଲପୁରରେ ସାଇବର ଅପରାଧ ବଢିଚାଲିଛି । ଏଥିର ସହରର ଜଣେ ବନ ବିଭାଗ କର୍ମଚାରୀ 20 ହଜାର ଟଙ୍କା ଠକେଇର ଶିକାର ହୋଇଛନ୍ତି । ଅଧିକ ପଢନ୍ତୁ...

ସମ୍ବଲପୁର: ବାରମ୍ବାର ସଚେତନତା ସତ୍ତ୍ୱେ ସହରରେ ଦିନକୁ ଦିନ ବଢିଚାଲିଛି ସାଇବର ଠକେଇ । ପୋଲିସ ପ୍ରଶାସନ ଓ ବ୍ୟାଙ୍କ ତରଫରୁ ବାରମ୍ବାର ସାଇବର ଠକେଇ ରୋକିବାକୁ ବିଭିନ୍ନ ପ୍ରୟାସ ଜାରି ରହିଥିଲେ ସୁଦ୍ଧା ଜିଲ୍ଲାରେ ସାଇବର ଅପରାଧ ବଢିଚାଲିଛି । କେବଳ ସାଧାରଣ ଲୋକ ନୁହଁନ୍ତି ବରଂ ଶିକ୍ଷିତ ବର୍ଗର ଲୋକେ ମଧ୍ୟ ଏହି ଠକେଇର ଶିକାର ହେଉଛନ୍ତି । ଏଥର ସମ୍ବଲପୁରର ଜଣେ ବନ ବିଭାଗ କର୍ମଚାରୀ 20 ହଜାର ଟଙ୍କା ଠକେଇର ଶିକାର ହୋଇଛନ୍ତି ।

ସମ୍ବଲପୁର ବନ ବିଭାଗର କର୍ମଚାରୀ ହେଉଛନ୍ତି ଅରୁଣ ନାଏକ । ତାଙ୍କ ବ୍ୟାଙ୍କ ଆକାଉଣ୍ଟରୁ ଅନଲାଇନରେ 20 ହଜାର 500 ଟଙ୍କା ଠକେଇ ହୋଇଥିବା ଧନୁପାଲି ଥାନାରେ ଅଭିଯୋଗ ହୋଇଛି । ଅରୁଣ ନିଜ ମୋବାଇଲ ଫୋନରେ ‘ଫୋନ ପେ’ ବ୍ୟବହାର କରୁଥିବାବେଳେ କିଛି ଦିନ ତଳେ ତାଙ୍କ ଫୋନକୁ ଏକ ଲିଙ୍କ ଆସିଥିଲା । ଏହାପରେ ଏକ ଅଜଣା ନମ୍ବରରେ ଜଣେ ବ୍ୟକ୍ତି ଫୋନ କରି ନିଜକୁ ‘ଫୋନ ପେ’ର ମ୍ୟାନେଜର ପରିଚୟ ଦେଇ ପୂର୍ବରୁ ଆସିଥିବା ସେହି ଲିଙ୍କକୁ ଖୋଲିବାକୁ କହି ଓଟିପି ମାଗିଥିଲା । ଏହାପରେ ଅରୁଣ ନିଜର ଓଟିପି ଦେବା ପରେ ତାଙ୍କ ଆକାଉଣ୍ଟରୁ 20 ହଜାର 500 ଟଙ୍କା କଟିଯାଇଥିଲା । ଏହା ପରେ ଏନେଇ ସେ ସମ୍ବଲପୁର ଧନୁପାଲି ଥାନାରେ ଅଭିଯୋଗ କରିଛନ୍ତି ।ଏହି ଘଟଣା ନେଇ ତଦନ୍ତ ଜାରି ରହିଛି ବୋଲି ସମ୍ବଲପୁର ଅତିରିକ୍ତ ଏସପି ପ୍ରଦୀପ କୁମାର ମହାପାତ୍ର ସୂଚନା ଦେଇଛନ୍ତି । ଏହାସହ ଏଭଳି ପରିସ୍ଥିତିରୁ ବଞ୍ଚିବା ପାଇଁ ଲୋକେ ଅଧିକ ସଚେତନ ହେବା ଉଚିତ ବୋଲି ଅତିରିକ୍ତ ଏସପି କହିଛନ୍ତି ।

ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ