ସମ୍ବଲପୁର: ଆସନ୍ତା 20 ତାରିଖରେ ପାଳିତ ହେବାକୁ ଯାଉଛି ପଶ୍ଚିମ ଓଡିଶାର କୃଷି ଭିତ୍ତିକ ଗଣପର୍ବ ନୂଆଁଖାଇ l ଏଥିପାଇଁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି l ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା' ସମଲେଶ୍ୱରୀଙ୍କ ମନ୍ଦିରରେ ନୂଆଁଖାଇ ଦିନ ପ୍ରଥମେ ନୂଆଁ ଚାଉଳରେ ଭୋଗ ଲାଗିବାର ପରମ୍ପରା ରହିଛି l ତେଣୁ ଆଜି ସମଲେଶ୍ୱରୀ ମନ୍ଦିରର ମୁଖ୍ୟ ପୂଜକ ଅମ୍ବିକା ରାୟଙ୍କ ଘରକୁ ପହଞ୍ଚିଛି ନୂଆଁଖାଇର ନୂଆଁ ଧାନ l ସମ୍ବଲପୁର ସହର ଉପକଣ୍ଠ ବଲଵସପୁର ଗା ର ସୁବାସ ବେହେରାଙ୍କ ଘରୁ ଏହି ନୂଆଁ ଧାନ ଆସିଛି l
ନୂଆଁଖାଇ ପାଇଁ ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା' ସମଲେଶ୍ୱରୀଙ୍କ ମନ୍ଦିରରେ ପ୍ରସ୍ତୁତି ଜୋର ସୋରରେ ଚାଲିଛି l ନୂଆଁଖାଇ ଦିନ ପ୍ରଥମେ ମା' ସମଲେଶ୍ୱରୀଙ୍କ ଠାରେ ନବାନ୍ନ ଲାଗି ପରେ ଘରେ ଘରେ ନୂଆଁଖାଇ ପାଳନ ହେବାର ପରମ୍ପରା ରହିଛି l ଏଥିପାଇଁ ନtଆଁ ଧାନର ଆବଶ୍ୟକ ପଡିଥାଏ l ଆଉ ବର୍ଷ ବର୍ଷ ଧରି ଏହି ଆବଶ୍ୟକତା ପୂରଣ କରି ଆସୁଛନ୍ତି ବଲବସପୁର ଗାଁର ସୁବାଷ ବେହେରା l
ମା' ସମଲେଶ୍ୱରୀଙ୍କ ପାଇଁ ଏହି ପରିବାର ଏକ ସ୍ୱତନ୍ତ୍ର ଜମିରେ ଧାନ ଚାଷ କରିଥାନ୍ତି। ଯେଉଁଠି ପାଣି ଅଧିକ ଜମା ହେଉନଥିବ ସେହି ଜମିରେ ସରିଆ ଧାନ ଚାଷ ହୋଇଥାଏ l ଏହି ଧାନ 2 ମାସ ବା 60 ଦିନରେ ଅମଳ ହେଉଥିବାରୁ ଏହାକୁ ଷାଠିଏ ଧାନ ମଧ୍ୟ କୁହାଯାଏ l ଏହି ଧାନ ସମ୍ପୂର୍ଣ୍ଣ ରୂପେ ପରିପକ୍ୱ ହେବା ପୂର୍ବରୁ ଏହାକୁ ବିଲରୁ ଅଣାଯାଇ ସମଲେଶ୍ୱରୀ ମନ୍ଦିରକୁ ପଠାଯାଏ l ଏହି ଧାନକୁ କୌଣସି ପଶୁ ପକ୍ଷୀ ଯେମିତି ସ୍ପର୍ଶ କରି ନ ପାରିବେ ତା ଉପରେ ଧ୍ୟାନ ରଖାଯାଏ l ଆଜି ଏହି ଧାନକୁ ଆଣି ସମଲେଶ୍ୱରୀ ମନ୍ଦିରର ମୁଖ୍ୟ ପୂଜକ ଅମ୍ବିକା ରାୟଙ୍କୁ ପ୍ରଦାନ କରାଯାଇଛି l
ଏହା ବି ପଢନ୍ତୁ...ପଶ୍ଚିମ ଓଡ଼ିଶାର ଗଣପର୍ବ ନୂଆଖାଇ, ନୂଆ ଖାଇବେ କଳାହାଣ୍ଡିବାସୀ
ଆସନ୍ତା 20 ତାରିଖରେ ନିର୍ଦ୍ଧାରିତ ସମୟରେ ମା' ସମଲେଶ୍ୱରୀଙ୍କ ଠାରେ ନୂଆଁ ଚାଉଳର ଭୋଗ ଲାଗିଲା ପରେ ଘରେ ଘରେ ନୂଆଁଖାଇ ପାଳନ ହେବ । ଏହାସହ ନୂଆଁଖାଇ ଭେଟ ଘାଟ କାର୍ଯ୍ୟକ୍ରମ ଅନୁଷ୍ଠିତ ହେବ l ପାରିବାରିକ, ସାମାଜିକ ଓ ଆଧ୍ୟାତ୍ମିକତାର ନିଦର୍ଶନ ଏହି ଗଣ ପର୍ବ ସାଧରଣତଃ ଏକତାଵଦ୍ଧ ଜୀବନ ଯାପନ, ବଡ଼ଙ୍କୁ ସମ୍ମାନ ତଥା କନିଷ୍ଠଙ୍କୁ ସ୍ନେହ ଦେବା ସହ ପ୍ରକୃତି ପୂଜାର ସନ୍ଦେଶ ଦେଇଥାଏ l
ଇଟିଭି ଭାରତ, ସମ୍ବଲପୁର
