ସମ୍ବଲପୁର: ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଗିରଫ ହୋଇଥିବା ଆଇଏଫ୍ଏସ୍ ଅଭୟ ପାଠକଙ୍କ ସମ୍ପତ୍ତିର ଯାଞ୍ଚ ଆରମ୍ଭ କରିଛି ଭିଜିଲାନ୍ସ । ସମ୍ବଲପୁର ଭିଜିଲାନ୍ସ ପକ୍ଷରୁ ଅଭୟଙ୍କ ବିଭିନ୍ନ ବ୍ୟାଙ୍କରେ ଆକାଉଣ୍ଟ ଅଛି କି ନାହିଁ ତଦନ୍ତ ଆରମ୍ଭ ହୋଇଛି । ଏନେଇ ଭିଜିଲାନ୍ସ ସମ୍ବଲପୁରରେ ଥିବା ବିଭିନ୍ନ ବ୍ୟାଙ୍କକୁ ନୋଟିସ୍ ଜାରି କରିଛି ।
ସୂଚନା ଅନୁଯାୟୀ ଆଇଏଫଏସ ଅଧିକାରୀ ଅଭୟ ପାଠକ ଏବଂ ତାଙ୍କ ପୁଅ ଆକାଶ ପାଠକ ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଗିରଫ ହୋଇଛନ୍ତି । ଏହାପରେ ଉଭୟଙ୍କ ନାମରେ ବିଭିନ୍ନ ବେଆଇନ ମାମଲା ରୁଜୁ ହୋଇଥିବା ସୂଚନା ମିଳିଛି । ଏନେଇ ରାଜ୍ୟର ବିଭିନ୍ନ ସ୍ଥାନରେ ଭିଜିଲାନ୍ସ ଓ କ୍ରାଇମବ୍ରାଞ୍ଚ ପକ୍ଷରୁ ଚଢାଉ କରାଯାଉଛି । 1991 ମସିହାରେ ଅଭୟ ସମ୍ବଲପୁରରେ ଯୁଗ୍ମ ନିର୍ଦ୍ଦେଶକ ସୋସିଆଲ ଫରେଷ୍ଟ୍ରିରେ ଯୋଗଦେଇଥିଲେ ।
ଚାକିରି କାଳରେ ଅଭୟ କେତେ ପରିମାଣର ବ୍ୟାଙ୍କ ବାଲାନ୍ସ ରଖିଛନ୍ତି ସେନେଇ ଭିଜିଲାନ୍ସ ତଦନ୍ତ ଆରମ୍ଭ ହୋଇଛି । ଏଥିସହ ସମ୍ବଲପୁରରେ ଅଭୟଙ୍କ ସମ୍ପତ୍ତିର ଖୋଳତାଡ କରୁଛି ଭିଜିଲାନ୍ସ । ଅନ୍ୟପଟେ ଭିଜିଲାନ୍ସ ପକ୍ଷରୁ ସମ୍ବଲପୁରରେ ଥିବା ବିଭିନ୍ନ ବ୍ୟାଙ୍କକୁ ତଥ୍ୟ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
