ସମ୍ବଲପୁର: ଧରା ପଡିଛି ସହରରେ ସକ୍ରିୟ ଥିବା ଗଞ୍ଜେଇ ଚୋରା ଚାଲାଣ ରାକେଟ । ରବିବାର ଗଞ୍ଜେଇ ଚୋରା ଚାଲାଣ ଅଭିଯୋଗରେ ପୋଲିସ 4 ଜଣକୁ ଗିରଫ କରିଛି । ଯାହାକୁ ନେଇ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ସମ୍ବଲପୁର ସଦର ଏସ୍ଡିପିଓ ।
ଅନ୍ୟପଟେ ଧରା ପଡିଥିବା ଅଭିଯୁକ୍ତମାନେ ହେଲେ ଗମ୍ଭାରୀପଙ୍କର ପିତାମ୍ବର ସେନ, ଯୁଜମୁରାର ଗୋପରଞ୍ଜନ ପଟ୍ଟନାୟକ ଓ ଚନ୍ଦନ ଧର । ପୋଲିସ ସେମାନଙ୍କୁ ଗିରଫ ପରେ ଜେରା କରିବା ସମୟରେ ସେମାନେ ଧୁତୁରାପଡାର ସୁଧାଂଶୁ ମହାନ୍ତିଙ୍କ ନାଁ କହିଥିଲେ ।
ସୂଚନା ଅନୁଯାୟୀ ସମ୍ବଲପୁର ସଦର ଥାନା ତରଫରୁ ଶନିବାର ରାତି 11ଟା 30 ମିନିଟ ସମୟରେ ତୁମ୍ବେସିଂହାରୁ ଚୌଧୁରୀ ଛକ ପର୍ଯ୍ୟନ୍ତ ପେଟ୍ରୋଲିଂ କରାଯାଇଥିଲା । ଏହି ସମୟରେ ସନ୍ଦେହଜନକ ଭାବେ 3 ଜଣ ବ୍ୟାଗ୍ ଓ ସୁଟ୍କେସ୍ ଧରି ଇତସ୍ତତଃ ବୁଲୁଥିବାର ଦେଖାଯାଇଥିଲା । ପରେ ଏମାନଙ୍କୁ ଅଟକାଇ ପଚରାଉଚୁରା କରିବା ସହିତ ଗିରଫ କରିଥିଲା ପୋଲିସ ।
ପରବର୍ତ୍ତୀ ସମୟରେ ଯାଞ୍ଚ ପରେ ଜଣା ପଡିଥିଲା କି ଗିରଫ ଅଭିଯୁକ୍ତଙ୍କ ପାଖରେ ଥିବା ସୁଟ୍କେସ୍ରେ ରହିଛି 34 କେଜି ଗଞ୍ଜେଇ ଓ 3500 ଟଙ୍କା । ଏଥିସହ ସେମାନଙ୍କ ପାଖରୁ ଗୋଟିଏ ପଲସର ବାଇକ ମଧ୍ୟ ଜବତ କରିଛି ପୋଲିସ । ତେବେ ଅଭିଯୁକ୍ତମାନେ ଏହି ଗଞ୍ଜେଇ ବୌଦ୍ଧରୁ ମଧ୍ୟପ୍ରଦେଶକୁ ଚାଲାଣ କରୁଥିବା ପୋଲିସ ସୂଚନା ଦେଇଛି ।
ଅଭିଯୁକ୍ତଙ୍କ ବିରୋଧରେ ପୋଲିସ ମାମଲା ନଂ 23/20 ବି(୨) ଏବଂ ସି 29 ଏନ,ଡି,ପି,ଏସ ଆକ୍ଟ ଲାଗୁ କରି କୋର୍ଟ ଚାଲାଣ କରିବା ନେଇ ସୂଚନା ଦେଇଛି ।
ସମ୍ବଲପୁରରୁ ଜୁସ୍ମନ ରଣା, ଇଟିଭି ଭାରତ
