ସମ୍ବଲପୁର: ଧମା ରେଞ୍ଜର ଦୁଇଟି ଜଙ୍ଗଲରୁ ହାତୀର ପୋଡା କଙ୍କାଳ ଠାବ କରିଛି ଏସଟିଏଫ । ଦୁର୍ବୃତ୍ତମାନେ ହାତୀ ଶୀକାର କରି ଦାନ୍ତ କାଟିନେବା ପରେ ପ୍ରମାଣ ନଷ୍ଟ କରିବା ପାଇଁ ହାତୀର ମୃତ ଦେହକୁ ପୋଡି ଦେଇଥିବା ଅନୁମାନ କରିଛି ବନବିଭାଗ ।
ଧମା ରେଞ୍ଜ ଘଞ୍ଚ ଜଙ୍ଗଲ ଭିତରୁ ମିଳିଲା ହାତୀର ପୋଡା କଙ୍କାଳ । କ୍ରାଇମବ୍ରାଞ୍ଚ ଏସଟିଏଫର ଆଜି ସକାଳୁ ସ୍ଥାନୀୟ ବନ ବିଭାଗ ସହ ସମ୍ବଲପୁର ଜିଲ୍ଲାର ଧମା ରେଞ୍ଜର ତବଳେଇ -ଦେଓଗାଁ ସଂରକ୍ଷିତ ଜଙ୍ଗଲ ଓ କୋଲଗାଁ ସଂରକ୍ଷିତ ଜଙ୍ଗଲରୁ ହାତୀର କଙ୍କାଳ ପୋଡା ଯାଇଥିବା କଙ୍କାଳ ଠାବ କରାଯାଇଛି । ଶିକାରୀ ମାନେ ହାତୀର ଦାନ୍ତ ଶୀକାର କରିବା ପରେ ଦାନ୍ତ ନେଇ ପ୍ରମାଣ ଲୁଚେବାକୁ ହାତୀର ମୃତ ଦେହକୁ ପୋଡି ଦେଇଥିବାର ଆଶଙ୍କା କରାଯାଉଛି । ବନ ବିଭାଗ କର୍ମଚାରୀ ସକ୍ରିୟ ଥବାବେଳେ ଶିକାରୀମାନେ କିପରି ଏଭଳି କାଣ୍ଡ ଭିଆଇଲେ ତାହା ସାଧାରଣରେ ପ୍ରଶ୍ନ ଉଠିଛି । ଶିକାରୀ ମାନଙ୍କ ସହ ବନ ବିଭାଗର କର୍ମଚାରୀ ମାନେ ଏହି କାଣ୍ଡରେ ସାମିଲ ଥିବା ଅଭିଯୋଗ ହୋଇଛି । ପ୍ରାୟ ତିନି ବସ୍ତା ହାତୀ କଙ୍କାଳ ଜବତ ହୋଇଛି ।
ପ୍ରଥମେ ଶିକାରୀ ମାନେ ଆସି ହାତୀକୁ ମାରି ତାର ଦାନ୍ତ ନେଇ ପଳାଇ ଥିବା ବେଳେ ବନ ବିଭାଗର କେତେକ ଅସାଧୁ କର୍ମଚାରୀ ହାତୀ ମୃତ ଦେହର ପ୍ରମାଣ ନଷ୍ଟ କରିବା ପାଇଁ ପୋଡି ଦେଇଥିବା ଅଭିଯୋଗ ହୋଇଛି । ଜାତୀୟ ରାଜପଥ ପାଖ ଦେଇ ଯାଇଥିବା ଜଙ୍ଗଲ ନିକଟରେ ହାତୀର ମୃତ ଦେହକୁ ଭଲ ଭାବରେ ପୋଡାଯାଇଥିବା ସହିତ ଜାତୀୟ ରାଜପଥଠୁ ଦୂର ଘଞ୍ଚ ଜଙ୍ଗଲ ଭିତରେ ହାତୀକୁ ଅଧା ପୋଡାଯାଇଥିବା କହିଛନ୍ତି ପରିବେଶବିତ ଶୁଭେନ୍ଦୁ ମଲ୍ଲିକ । ତେବେ ଏବାବଦରେ ଡିଏଫଓ ଅବଗତ ରହିଛନ୍ତି କି ନାହିଁ ସେ ବିଷୟରେ ପ୍ରଶ୍ନ ଉଠାଇଛନ୍ତି ପରିବେଶବିତ । ଏନେଇ ଡିଏଫଓଙ୍କ ଉପରେ କାର୍ଯ୍ୟାନୁଷ୍ଠାନ ହେବା ଉଚିତ ବୋଲି କହିଛନ୍ତି ଶୁଭେନ୍ଦୁ । ଯେଉଁ ଯେଉଁ ସ୍ଥାନରୁ ହାତୀର ପୋଡା କଙ୍କାଳ ଠାବ ହୋଇଛି ତାହାର ଯାଞ୍ଚ ପାଇଁ ଭୁବନେଶ୍ବର OUATକୁ ପଠାଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି ।
ଇଟିଭି ଭାରତ, ସମ୍ବଲପୁର
