ସମ୍ବଲପୁର: ମାଟ୍ରିକ ପରୀକ୍ଷା ଆରମ୍ଭରୁ ବିଭିନ୍ନ ସ୍ଥାନରେ ବିଭ୍ରାଟ ଦେଖାଦେଇଛି । ପ୍ରଥମେ ବାଲେଶ୍ବର ଆଉ ଏବେ ସମ୍ବଲପୁରରେ ଜଣେ ନକଲି ପରୀକ୍ଷାର୍ଥୀ ଧରାପଡିଛନ୍ତି । ବୁଧବାର ମାତୃଭାଷା ପରୀକ୍ଷା ଥିବାବେଳେ ସମ୍ବଲପୁରରେ ଜଣେ ଛାତ୍ରଙ୍କ ସ୍ଥାନରେ ଜଣେ ଯୁବତୀ ପରୀକ୍ଷା ଦେଉଥିବା ଅଭିଯୋଗ ହୋଇଛି । ଲକ୍ଷଣ ମେହେର ନାମକ ଜଣେ ମାଟ୍ରିକ ପରୀକ୍ଷାର୍ଥୀ ନିଜର ଆଡମିଟ କାର୍ଡରେ ପରିବର୍ତ୍ତନ କରି ଏହାକୁ ଲକ୍ଷ୍ମୀ ମେହେର କରିଥିଲେ । ପରେ ସେହି କାର୍ଡରେ କମଳା ସେଠ ନାମକ ଜଣେ ଯୁବତୀ ପରୀକ୍ଷା ଦେଉଥିବା ଅବସ୍ଥାରେ ଧରାପଡିଛନ୍ତି ।
ସୂଚନାନୁଯାୟୀ, ରାଜ୍ୟ ମୁକ୍ତ ବିଦ୍ୟାଳୟର ମାଟ୍ରିକ ପରୀକ୍ଷା ସେଣ୍ଟର, କମିଶନର କଲୋନୀ ସ୍କୁଲରେ ପଡିଥିଲା । ଯେଉଁଠି ଛାତ୍ର ଲକ୍ଷ୍ମଣ ମେହେର ପରୀକ୍ଷା ନଦେଇ ତାଙ୍କ ଆଡ଼ମିଟ କାର୍ଡର ଜାଲିଆତି କରି କମଳା ସେଠ ନାମକ ଜଣେ ଯୁବତୀଙ୍କୁ ଲକ୍ଷ୍ମୀ ମେହେର ନାମରେ ପରୀକ୍ଷାରେ ବସାଇଥିଲେ । ହେଲେ ପରୀକ୍ଷା ଦେବା ସମୟରେ ପରୀକ୍ଷା କେନ୍ଦ୍ରର ସୁପରିଟେଣ୍ଡେଟ ଉକ୍ତ ଯୁବତୀଙ୍କୁ ଧରିଥିଲେ । 1988 ରାଜ୍ୟ ପରୀକ୍ଷା ନିୟମ ଅନୁଯାୟୀ ସମ୍ବଲପୁର ଧନୁପାଲୀ ପୋଲିସ ଉଭୟ ଲକ୍ଷଣ ମେହେର ଏବଂ କମଳା ସେଠକୁ ଗିରଫ କରିଛି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
