ସମ୍ବଲପୁର: କୋଭିଡ-19 ପାଇଁ ଏବେ ସାରା ଦେଶରେ ଲକଡାଉନ ପରିସ୍ଥିତି। କୋରୋନାକୁ ରୋକିବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବହୁ ପଦକ୍ଷେପ ଗ୍ରହଣ କରିଛନ୍ତି। ପ୍ରତ୍ୟେକ ସ୍ତରରେ ସଚେତନତା ଜାରି ରହିଛି। ଆଉ ଏହା ସ୍ବାଭାବିକ ମଧ୍ୟ। ତେବେ ଏହି ଲକଡାଉନ ଭିତରେ ଏମିତି ଅନେକ ଜିନିଷ ଘଟୁଛି ଯାହା ମୁଖ୍ୟତଃ ଗ୍ରାମାଞ୍ଚଳର ଗରିବ ଓ ମଧ୍ୟବିତ୍ତ ଶ୍ରେଣୀର ଲୋକଙ୍କ ସାମାଜିକ କର୍ମ ଓ ରୀତି ନୀତି ଉପରେ ପ୍ରଭାବ ପଡିଛି।
ଯେପରିକି ପୂର୍ବରୁ ନିର୍ଦ୍ଧାରିତ ବିବାହ, ବ୍ରତଘର ପାଇଁ ଲୋକେ ନିମନ୍ତ୍ରଣ ପତ୍ର ବାଣ୍ଟି ସାରିଥିଲେ ତାହା ଏବେ ଲକଡାଉନ ପାଇଁ ଅନିର୍ଦ୍ଧିଷ୍ଟ କାଳ ପାଇଁ ଘୁଞ୍ଚିଛି । ତେବେ ଲକଡାଉନରେ ଏପରି ଏକ ପରିବାରକୁ ଆମେ ଭେଟିଥିଲୁ । ଏ ହେଉଛନ୍ତି କପିଳେଶ୍ବର ମାଝୀ। ଘର ସମ୍ବଲପୁର ଜିଲ୍ଲା ଯୁଜୁମୁରା ବ୍ଲକର କୁକୁଡାପାଲି ପଞ୍ଚାୟତର ଶିକ୍ରାପାଲି ଗାଁ। ଆସନ୍ତା ଏପ୍ରିଲ 2 ତାରିଖର ଝିଅର ବିବାହ କରିଥାଆନ୍ତେ କପିଳେଶ୍ବର । ନିମନ୍ତ୍ରଣ ପତ୍ର ବଣ୍ଟାଠାରୁ ଆରମ୍ଭ କରି ମଣ୍ଡପ ବୁକିଂ ପର୍ଯ୍ୟନ୍ତ ସବୁ ସରିଥିଲା । ବ୍ୟବହାର ବାବଦକୁ କିଣାବିକା ବି ସରିଥିଲା ।
ହେଲେ କୋରୋନା ପାଇଁ ଶେଷ ମୁହୂର୍ତ୍ତରେ ଅଟକିଗଲା ବାହାଘର । ତେବେ ଏଥିରେ ଦୁଃଖିତ ହେବା ବଦଳରେ ଅନେକ ଲୋକଙ୍କ ସଂକ୍ରମଣରୁ ବଞ୍ଚାଇଥିବାରୁ ଖୁସି ପ୍ରକାଶ କରିଛନ୍ତି କପିଳେଶ୍ବର ଓ ତାଙ୍କ ପରିବାର । ସରକାରଙ୍କ ଘୋଷଣାକୁ ସମ୍ମାନ ଦେଇ ଝିଅର ବିବାହକୁ ଆସନ୍ତା ଜୁନ ମାସକୁ ଘୁଞ୍ଚାଇଛନ୍ତି କପିଳେଶ୍ବର । ସେପଟେ ଏନେଇ ସେ କହିଛନ୍ତି କି ବର୍ତ୍ତମାନ ସମୟରେ ସରକାରୀ ନିୟମକୁ ମାନିବା ସହ ଏହାକୁ ପାଳନ କରିବା ଦରକାର । ଆମେ ଆମର କର୍ତ୍ତବ୍ୟ କରୁଛୁ, ଆପଣ ବି କରନ୍ତୁ ।
ବର୍ତ୍ତମାନର ଏହି ପରିସ୍ଥିତିରେ ଲକଡାଉନ ଯୋଗୁଁ ଲୋକଙ୍କର କିଛିଟା କ୍ଷତି ହୋଇପାରେ। କିନ୍ତୁ ପ୍ରତିବଦଳରେ ଜୀବନଠାରୁ ମୂଲ୍ୟବାନ ଆଉ କିଛି ନାହିଁ ବୋଲି ଗାଁର ଲୋକେ ବେଶ ଭଲ ଭାବେ ବୁଝିଛନ୍ତି।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
