ସମ୍ବଲପୁର: ପୁଣି ବିବାଦରେ ସମ୍ବଲପୁର ବୁର୍ଲା ଭୀମସାର ମେଡିକାଲ କଲେଜ । ଡାକ୍ତରୀ ଛାତ୍ର ଓ ସୁରକ୍ଷାକର୍ମୀଙ୍କ ମଧ୍ୟରେ ବିବାଦକୁ ନେଇ ଭୀମସାରରେ ତୀବ୍ର ଉତ୍ତେଜନା ସୃଷ୍ଟି ହୋଇଛି । ମେଡିକାଲ ପରିସରରେ ଡାକ୍ତରୀ ଛାତ୍ର ଓ କାର୍ଯ୍ୟରତ ସୁରକ୍ଷକର୍ମୀଙ୍କ ମଧ୍ୟରେ ପ୍ରବଳ ମାରପିଟ୍ ହୋଇଛି । ଏଥିରେ ଜଣେ ସୁରକ୍ଷାକର୍ମୀ ଆହତ ହୋଇଛନ୍ତି । ତାଙ୍କୁ ଚିକିତ୍ସା ପାଇଁ ଏକ ବେସରକାରୀ ହସ୍ପିଟାଲରେ ଭର୍ତ୍ତି କରାଯାଇଥିବା ଅଭିଯୋଗ ହୋଇଛି ।
ଅଭିଯୋଗ ଅନୁସାରେ, ଗତକାଲି(ବୁଧବାର) ବିଳମ୍ବିତ ରାତି ପ୍ରାୟ ୧ଟାରୁ ୩ଟା ମଧ୍ୟରେ JH-1- ହଷ୍ଟେଲରେ ଜଣେ ସୁରକ୍ଷାକର୍ମୀ କାର୍ଯ୍ୟ କରୁଥିବା ବେଳେ କୌଣସି କାରଣକୁ ନେଇ କିଛି ଡାକ୍ତରୀ ଛାତ୍ର ତାଙ୍କୁ ମାରପିଟ୍ କରିଥିଲେ । ଏହାପରେ ଡାକ୍ତରୀ ଛାତ୍ରମାନେ ସିକ୍ୟୁରିଟି କାର୍ଯ୍ୟାଳୟକୁ ଆସି ଭଙ୍ଗାରୁଜା କରିଥିଲେ । ଏହି ମାରପିଟ୍ରେ ସୁରକ୍ଷାକର୍ମୀ ଜଣକ ଆହତ ହୋଇଥିଲେ । ହେଲେ ସେଠାରେ କୌଣସି ଡାକ୍ତର ସମ୍ପୃକ୍ତ ଆହତ ସୁରକ୍ଷାକର୍ମୀଙ୍କ ଚିକିତ୍ସା କରିନଥିଲେ । ତେଣୁ ତାଙ୍କୁ ନିକଟସ୍ଥ ଏକ ବେସରକାରୀ ହସ୍ପିଟାଲରେ ଭର୍ତ୍ତି କରାଯାଇଥିବା ଅଭିଯୋଗ ହୋଇଛି ।
ଏହି ଘଟଣା ସାମ୍ନାକୁ ଆସିବା ପରେ ପଶ୍ଚିମ ଓଡିଶା ସୁରକ୍ଷାକର୍ମୀ ସଂଘ ପକ୍ଷରୁ ବୁର୍ଲା ଥାନା ଘେରାଉ କରାଯିବା ସହ ଅଭିଯୁକ୍ତଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଛି l ଏହାକୁ ନେଇ ଭୀମସାର ପରିସରରେ ଉତ୍ତେଜନା ପ୍ରକାଶ ପାଇଛି । ଅନ୍ୟପଟେ ବୁର୍ଲା ମେଡିକାଲ କଲେଜ ଡିନ ଜୟଶ୍ରୀ ଦୋରା କହିଛନ୍ତି ଯେ, ଉଭୟ ପକ୍ଷ ସହ ଆଲୋଚନା ହୋଇଛି । ଏନେଇ କଲେଜ କାଉନସିଲରେ ବୈଠକ ହେବ । ତେବେ ଘଟଣା ସମ୍ପର୍କରେ କୌଣସି ଡାକ୍ତରୀ ଛାତ୍ରଙ୍କ ପ୍ରତିକ୍ରିୟା ମିଳି ପାରିନାହିଁ ।
ଏଠାରେ ଉଲ୍ଲେଖଯୋଗ୍ୟ ଯେ, କିଛି ମାସ ତଳେ ବୁର୍ଲା ଭୀମସାର ମେଡିକାଲ କଲେଜରେ ଇଣ୍ଟର ମେଡି-ଫେଷ୍ଟରେ ଅଂଶଗ୍ରହଣ କରିବାକୁ ବ୍ରହ୍ମପୁର ଏମକେସିଜି ମେଡିକାଲରେ ଛାତ୍ର ଯାଇଥିବା ବେଳେ କୌଣସି କଥାକୁ ନେଇ ଉଭୟ କଲେଜ ଛାତ୍ରଙ୍କ ମଧ୍ୟରେ ପ୍ରବଳ ପାଟିତୁଣ୍ଡ ହୋଇଥିଲା । ଭୀମସାର ଛାତ୍ର ଏମକେସିଜି ଛାତ୍ରଙ୍କୁ ଗାଳିଗୁଲଜ କରିବା ସହ ମାଡ଼ ମାରିଥିଲେ । ଏହି ଆକ୍ରମଣରେ ଏମକେସିଜିର ୬ ଜଣ ଛାତ୍ର ଆହତ ହୋଇଥିଲେ । ଏପରିକି ଏମକେସିଜି ଛାତ୍ରମାନେ ଆସିଥିବା ବସକୁ ପଥର ମାଡ଼ କରି କାଚ ଭାଙ୍ଗି ଦେଇଥିଲେ ।
ଇଟିଭି ଭାରତ, ସମ୍ବଲପୁର
