ସମ୍ବଲପୁର: ଆଜି ହେଉଛି ତୃତୀୟ ପର୍ଯ୍ୟାୟ ନିର୍ବାଚନ ପ୍ରଚାରର ଶେଷ ଦିନ । ପ୍ରଚାରର ଶେଷ ଦିନରେ ଦମ୍ଭ ଦେଖାଇଛନ୍ତି ବିଜେଡି । ଦଳ ନିଜର ମାରାଥନ ପ୍ରଚାର ଆରମ୍ଭ କରିବା ସହ ଦଳ ସୁପ୍ରିମୋ ନିଜ ପୂର୍ବ ଭାଷଣକୁ ଦୋହାରାଇବା ସହ ଶଙ୍ଖ ଚିହ୍ନକୁ ବିପୁଳ ପରିମାଣରେ ଭୋଟ ଦେଇ ଜୟଯୁକ୍ତ କରିବାକୁ କହିଛନ୍ତି ।
ତେବେ 23 ତାରିଖରେ ତୃତୀୟ ପର୍ଯ୍ୟାୟ ନିର୍ବାଚନ ହେବାକୁ ଥିବା ବେଳେ ବିଜେଡିର ମଙ୍ଗ ଧରିଛନ୍ତି ଦଳ ସୁପ୍ରିମୋ ନବୀନ ପଟ୍ଟନାୟକ । ଏହି ଅବସରରେ ଆଜି ମୁଖ୍ୟମନ୍ତ୍ରୀ କୁଚିଣ୍ଡାର ମୁକୁନ୍ଦି ପଡ଼ିଆରେ ହୋଇଥିବ ବିଜେଡ଼ିର ଏକ ନିର୍ବାଚନୀ ପ୍ରଚାର ସଭାରେ ଯୋଗ ଦେଇ ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ଭିକ୍ଷା କରିଛନ୍ତି ।
ଏହାସହ ମୁଖ୍ୟମନ୍ତ୍ରୀ ସିଧାସଳଖ ୟୁ-ଟର୍ଣ୍ଣ ନେଇ କେନ୍ଦ୍ରସରକାରଙ୍କୁ ଟାର୍ଗେଟ କରିଛନ୍ତି । ନିର୍ବାଚନ ସମୟରେ ବିଜେପିର ନେତାମନ୍ତ୍ରୀଙ୍କ ଘନଘନ ଓଡିଶା ଗସ୍ତ,ଏହା ପୂର୍ବରୁ ଜଣେ ବି ନେତାଙ୍କ ଦେଖା ନାହିଁ । କେନ୍ଦ୍ର ସରକାର କୁଚକ୍ରାନ୍ତ କରି କାଳିଆ ଯୋଜନା ବନ୍ଦ କରିବାକୁ ପ୍ରୟାସ କରୁଛନ୍ତି । କିନ୍ତୁ ମୁଁ ଥିବା ପର୍ଯ୍ୟନ୍ତ ତାହା ହେବାକୁ ଦେବିନି ।
ମୁଖ୍ୟମନ୍ତ୍ରୀଙ୍କ ମୁଖ୍ୟ କହିବା କଥା ହେଲା ରାଜ୍ୟ ସରକାରଙ୍କ ଯୋଜନା ଗୁଡିକୁ କେନ୍ଦ୍ର ବନ୍ଦ କରିବାକୁ ଯୋଜନା କରୁଛି । ଏହା ସହ ଅଗାମୀ ନିର୍ବାଚନରେ କେନ୍ଦ୍ର ସରକାର ଗଠନରେ ଆଞ୍ଚଳିକ ଦଳ ମାନଙ୍କ ଅଧିକ ଗୁରୁତ୍ବ ରହିବ ଓ ଓଡ଼ିଆକୁ ଏହା ସୁହାଇବ ବୋଲି ନବୀନ କହିଛନ୍ତି ।
ଏହି ନିର୍ବାଚନ ପ୍ରଚାର ସଭାରେ କୁଚିଣ୍ଡା ବିଧାୟକ ପ୍ରାର୍ଥୀ କିଶୋର ନାଏକ, ସମ୍ବଲପୁର ଲୋକସଭା ପ୍ରାର୍ଥୀ ନଳୀନିକାନ୍ତ ପ୍ରଧାନ, ବିଜେଡ଼ି ନେତା କିଶୋର ମହାନ୍ତି ,ମନ୍ତ୍ରୀ ଶୁଶାନ୍ତ ସିଂ ପ୍ରମୁଖ ଉପସ୍ଥିତ ଥିଲେ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
