ସମ୍ବଲପୁର: ନିଜ ସୋରୁମରେ କାମ କରୁଥିବା ଆକାଉଣ୍ଟାଣ୍ଟକୁ ଜୀବନରେ ମାରିଦେବାର ଧମକ ଦେଇଛନ୍ତି ସୋ ରୁମ ମାଲିକ। ଏପରି ଅଭିଯୋଗ ଆଣିଛନ୍ତି ସମ୍ବଲପୁର ଜିଲ୍ଲା ସୁନାପଲିର ମହମ୍ମଦ ଅଲତାଫ ହୁସେନ ନାମକ ଜଣେ ଯୁବକ ଯିଏକି ବୁଢ଼ାରାଜାସ୍ଥିତ ଏକ ସୋରୁମରେ କାମ କରନ୍ତି ।
ସୂଚନା ଅନୁସାରେ ମହମ୍ମଦ ଅଲତାଫ ହୁସେନ ବୁଢ଼ାରାଜାସ୍ଥିତ ଏକ ସୋରୁମରେ ଆକାଉଣ୍ଟାଣ୍ଟ ଭାବେ କାମ କରି ଆସୁଥିଲେ। 2 ମାସ ହେଲା ତାଙ୍କ ସ୍ବାସ୍ଥ୍ୟଗତ ସମସ୍ୟାରୁ କାମକୁ ଯାଉ ନଥିଲେ। ତେବେ କିଛି ଦିନତଳେ ସୋରୁମ ମାଲିକ ତାଙ୍କୁ ଡାକି ଏକ ହୋଟେଲ ରୁମ ଭିତରେ ବନ୍ଧୁକ ଦେଖାଇ ଏକ କାଗଜରେ ଦସ୍ତଖତ କରିବାକୁ କହିଥିଲେ। ସୋ ରୁମ ମାଲିକ ଅଲତାଫଙ୍କୁ ଟଙ୍କା ଚୋରି କରିଥିବାର କହି ଟଙ୍କା ନ ଫେରାଇଲେ ତାଙ୍କୁ ଓ ତାଙ୍କ ପରିବାରକୁ ବରବାଦ କରିଦେବେ ଓ ବିଭିନ୍ନ ମିଥ୍ୟା କେସରେ ଫସାଇ ଦେବେ ବୋଲି କହିଥିବା ଅଲତାଫ କହିଛନ୍ତି।
ଏନେଇ ଅଲତାଫ ସମ୍ବଲପୁର ଅଇଁଠାପାଲି ଥାନାରେ ଅଭିଯୋଗ କରିବାକୁ ଯାଇଥିଲେ । କିନ୍ତୁ ଅଇଁଠାପାଲି ଥାନା ଅଧିକାରୀ ଏଫଆଇଆର ନରଖି ତାଙ୍କ ସହିତ ଦୁର୍ବ୍ୟବହାର କରିଥିବା ଅଭିଯୋଗ କରିଛନ୍ତି ଅଲତାଫ । ଏହାପରେ ସେ ସମ୍ବଲପୁର ଅତିରିକ୍ତ ଏସପିଙ୍କୁ ଭେଟି ନିଜର ସମସ୍ୟା ସମ୍ପର୍କରେ ଅବଗତ କରାଇଛନ୍ତି। ତେବେ ଏନେଇ ସମ୍ବଲପୁର ଅତିରିକ୍ତ ଏସପି ପ୍ରଦୀପ କୁମାର ମହାପାତ୍ର କ୍ୟାମେରା ଆଗରେ କିଛିବି କହିବାକୁ ମନା କରିଛନ୍ତି।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
