ସମ୍ବଲପୁର: ଆଜିର ଦୁନିଆରେ ସମସ୍ତେ ଉଚ୍ଚ ଶିକ୍ଷିତ ହୋଇ ସରକାରୀ ଚାକିରୀ ପଛରେ ଧାଉଁଛନ୍ତି । ତେବେ ବର୍ତ୍ତମାନ ମଧ୍ୟ ଏମିତି ଅନେକ ଯୁବକ ଅଛନ୍ତି ଯେଉଁମାନେ ଆଜିବି ଉଚ୍ଚ ଶିକ୍ଷିତ ହୋଇ ଆତ୍ମନିର୍ଭରଶୀଳ ହେବାକୁ ପସନ୍ଦ କରନ୍ତି। ସମ୍ବଲପୁରର ଏମିତି ଜଣେ ଯୁବକ ହେଲେ ଦିବ୍ୟରାଜ ବେରିହା । ତାଙ୍କର ଶିକ୍ଷାଗତ ଯୋଗ୍ୟତା ଏମ ଫିଲ ହୋଇଥିଲେ ମଧ୍ୟ ସେ ଚାକିରୀ ନକରି ଅତ୍ୟାଧୁନିକ ବାୟୋଫ୍ଲକ୍ସ ଓ ସେମି ବାୟୋଫ୍ଲକ୍ସ ପଦ୍ଧତିରେ ମାଛ ଚାଷ କରିବା ସହ 12 ପ୍ରକାର ମାଛ ନେଇ ରିସର୍ଚ୍ଚ ମଧ୍ୟ କରୁଛନ୍ତି।
ସମ୍ବଲପୁର ସହରର ଦିବ୍ୟରାଜ। ଶିକ୍ଷାଗତ ଯୋଗ୍ୟତା କହିଲେ ବିଜ୍ଞାନରେ ଏମଫିଲ। ତେବେ ତାଙ୍କର ପେଶା ହେଉଛି ମାଛ ଚାଷ କରିବା। ମାତ୍ର ତାଙ୍କର ମାଛ ଚାଷ ପାରମ୍ପରିକ ପଦ୍ଧତିରେ ସୀମିତ ନାହିଁ। ସେ ଅତ୍ୟାଧୁନିକ ବାୟୋଫ୍ଲକ୍ସ ଓ ସେମି ବାୟୋଫ୍ଲକ୍ସ ପଦ୍ଧତିରେ ମାଛ ଚାଷ କରୁଛନ୍ତି। 3 ଟି କୁଣ୍ଡରେ ବାୟୋଫ୍ଲକ୍ସ ଚାଷ ହେଉଥିବାବେଳେ ନିଜ ଫାର୍ମହାଉସରେ 2 ଟି ଟ୍ରେନଜ ଖୋଲି ସେଠାରେ ପୋଖରୀ ପାଣି ଜରିଆରେ ସେମି ବାୟୋଫ୍ଲକ୍ସ ମାଛ ଚାଷ ମଧ୍ୟ କରୁଛନ୍ତି।
ଏହାସହ ସେ 12 ପ୍ରକାରର ମାଛ ଉପରେ ରିସର୍ଚ୍ଚ ମଧ୍ୟ କରୁଛନ୍ତି। ଏହି ଚାଷ ପାଇଁ ସେ ନିଜର ଶିକ୍ଷା ସହ ଇଣ୍ଟରନେଟର ସାହାଯ୍ୟ ନେଇଛନ୍ତି । ଏହି ଇଣ୍ଟରନେଟ ମାଧ୍ୟମରେ କିଛି ସୂଚନା ସଂଗ୍ରହ କରି ସେ ନିଜର ଫାର୍ମ ହାଉସରେ ଏକ ପୋଖରୀ ଖୋଲି ଏହି ମାଛ ଚାଷ ଆରମ୍ଭ କରିଥିଲେ।
ପାରମ୍ପରିକ ପଦ୍ଧତିରେ ମାଛ ଚାଷ କରି ଚାଷୀମାନେ କ୍ଷତିରେ ପଡୁଥିବା ବେଳେ ଦିବ୍ୟରାଜ ଏହି ଅତ୍ୟାଧୁନିକ ପଦ୍ଧତିରେ ଚାଷ କରି ଲାଭବାନ ହେଉଛନ୍ତି। ଏହା ସହ କେତେକ ସ୍ଥାନୀୟ ଲୋକଙ୍କୁ ନିଜ ଫାର୍ମ ହାଉସରେ ନିଯୁକ୍ତି ମଧ୍ୟ ଦେଇଛନ୍ତି।
ଆଗକୁ ଦିବ୍ୟରାଜ ଏହି ବ୍ୟବସାୟକୁ ବଢାଇବା ପାଇଁ ଅନେକ ନୂଆ ନୂଆ ଜ୍ଞାନକୌଶଳ ପସ୍ତୁତ କରିଛନ୍ତି। ତାଙ୍କର ଏହି ଉଦ୍ୟମ ସ୍ଥାନୀୟ ଯୁବକଙ୍କ ପାଇଁ ଏକ ପ୍ରେରଣାର ଉତ୍ସ ପାଲଟିଛି।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
