ରାୟଗଡା: ଜିଲ୍ଲାର ଶିକ୍ଷା ପ୍ରକଳ୍ପ ନିର୍ଦ୍ଦେଶକ ପରିଚୟ ଦେଇ ଶିକ୍ଷୟତ୍ରୀଙ୍କଠାରୁ 5 ହଜାର ଟଙ୍କା ଲାଞ୍ଚ ମାଗିବା ଘଟଣା ଯୁବକଙ୍କୁ ପଡିଲା ମହଙ୍ଗା । ବାନ୍ଧିଲା ପୋଲିସ ।
ଲାଞ୍ଚ ମାଗିଥିବା ବ୍ୟକ୍ତି ଜଣକ ହେଲେ ଭୀମ ଗାଣ୍ଟା । ତାଙ୍କ ଘର ଚାନ୍ଦିଲି ଥାନା ଅନ୍ତର୍ଗତ ଖେଦାପଡା ଗ୍ରାମରେ । ଭୀମ ବିଷମକଟକ ବ୍ଲକର ସାନସାର୍ତେଲି ଗ୍ରାମର ପ୍ରାଥମିକ ବିଦ୍ୟାଳୟକୁ ଯାଇ ରଞ୍ଜିତା ଉଲ୍ଲାକା ନାମକ ଜଣେ ଠିକାଶିକ୍ଷୟତ୍ରୀଙ୍କୁ ନିଜକୁ ରାୟଗଡା ଜିଲ୍ଲା ଶିକ୍ଷା ପ୍ରକଳ୍ପ ନିର୍ଦ୍ଦେଶକ ପରିଚୟ ଦେଇ ଧମକଚମକ ଦେବାସହ 5 ହଜାର ଟଙ୍କା ଲାଞ୍ଚ ମାଗିଥିଲେ । ଏହାସହ ଶିକ୍ଷୟତ୍ରୀ ଯଦି ଟଙ୍କା ନଦିଅନ୍ତି ତେବେ ତାଙ୍କୁ ଚାକିରୀରୁ ବହିଷ୍କୃତ କରିବା ନେଇ ଧମକ ଦେଇଥିଲେ । ।
ମାତ୍ର ଶିକ୍ଷୟତ୍ରୀ ଜଣକ ଉପଯୁକ୍ତ ବୁଦ୍ଧି ଲଗାଇ ଗ୍ରାମର ଲୋକଙ୍କୁ ଡାକିଥିଲେ । ଗ୍ରାମଲୋକ ସ୍କୁଲରେ ପହଞ୍ଚି ବ୍ୟକ୍ତିଙ୍କୁ ତାଙ୍କର ପରିଚୟ ମାଗିଥିଲେ । ହେଲେ ବ୍ୟକ୍ତିଜଣଙ୍କର କୌଣସି ପରିଚୟ ପତ୍ର ନଥିବାରୁ ପୋଲିସକୁ ଖବରଦେଇଥିଲେ । ଘଟଣାସ୍ଥଳରେ ପୋଲିସ ପହଞ୍ଚି ଭୀମଙ୍କଠାରୁ ଏକ ବାଇକ ସହ 50ରୁ ଉର୍ଦ୍ଧ ଆଧାର କାର୍ଡ ଜବତ କରିଥିଲେ । ଏନେଇ ବିଷମକଟକ ଥାନାରେ ସ୍କୁଲ କମିଟିର ସଭାପତିଙ୍କ ଏକ ଲିଖିତ ଅଭିଯୋଗ ପରେ ଭୀମକୁ ଗିରଫ କରାଯାଇ କୋର୍ଟ ଚାଲଣ କରାଯାଇଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
