ରାୟଗଡା: ଖରା ଆରମ୍ଭରୁ ଜଳ ଚିନ୍ତା । ଆନ୍ଧ୍ର-ଓଡ଼ିଶା ସୀମାନ୍ତ ରାୟଗଡ଼ା ବ୍ଲକ ବୈରାଗିହାଲୁଆ ପଞ୍ଚାୟତର ବ୍ରାହ୍ମଣହାଲୁଆ ଗାଁରେ ଦେଖାଦେଇଛି ଜଳକଷ୍ଟ । ଗ୍ରାମରେ ୧୬ ପରିବାର ବସବାସ କରୁଥିବା ବେଳେ ପାନୀୟ ଜଳ ପାଇଁ ରହିଛି ଗୋଟିଏ ନଳକୂପ। ଯେଉଁଥିରୁ ୨୪ ଘଣ୍ଟାରେ ବାହାରୁଛି ମାତ୍ର ୧୦ ହାଣ୍ଡି ପାଣି। ଯାହା ସମୁଦ୍ରକୁ ଶଙ୍ଖେ ସଦୃଶ୍ୟ।
ଗ୍ରୀଷ୍ମ ଆରମ୍ଭରୁ ଗାଁରେ ଜଳକଷ୍ଟ ଦେଖା ଦେଇଥିବା ବେଳେ ନଳକୂପ ଅଭାବରୁ ଗାଁଲୋକ ପାଳି କରି ପାଣି ନେଉଛନ୍ତି । ଏହା ଦିନେ କି ଦୁଇଦିନ ନୁହଁ, ବରଂ ବର୍ଷବର୍ଷ ଧରି ଏହି ଗାଁରେ ଜଳ କଷ୍ଟ ଲାଗି ରହିଥିଲେ ମଧ୍ୟ ପ୍ରଶାସନ ଆବଶ୍ୟକ ନଳକୂପ ଖନନ କିମ୍ବା ଗାଁରେ ଥିବା ଗୋଟିଏ ନଳକୂପର ମରାମତି କରୁନି ।
ରାୟଗଡ଼ା ଜିଲ୍ଲା ସଦର ମହକୁମା ୧୫ କିମି ଦୂରରେ ରହିଛି ଏହି ଗାଁ । ଗ୍ରାମରେ ୧୬ଟି ପରିବାରର ପାଖାପାଖି ୬୨ରୁ ଊର୍ଦ୍ଧ୍ବ ଲୋକ ବସବାସ କରନ୍ତି । ସମସ୍ତେ ଆଦିବାସୀ ସମ୍ପ୍ରଦାୟର । ଗାଁଠୁ ୫୦ ମିଟର ଦୂରରେ ନାଗାବଳୀ ନଦୀ ପ୍ରବାହିତ ହେଉଥିଲେ ମଧ୍ୟ ଜଳ ପ୍ରଦୂଷିତ କାରଣରୁ ବ୍ୟବହାର ଯୋଗ୍ୟ ନୁହଁ । ପାଖରେ କୌଣସି ଝରଣା ଟିଏ ନଥିବାରୁ ପାନୀୟ ଜଳର ଏକମାତ୍ର ମାଧ୍ୟମ ପାଲଟିଛି ନଳକୂପ ।
ଅନ୍ୟଦିନ ଗୁଡ଼ିକରେ ନଳକୂପରୁ ଆବଶ୍ୟକ ପାଣି ବାହାରୁ ଥିବାବେଳେ ଗ୍ରୀଷ୍ମ ଋତୁରେ ଭୂତଳ ଜଳସ୍ତର ହ୍ରାସ ଯୋଗୁଁ ନଳକୂପ ଗ୍ରାମବାସୀଙ୍କ ଆବଶ୍ୟକ ମେଣ୍ଟେଇ ପାରୁନି । ଫଳରେ ପାଣି ପାଇଁ ଗ୍ରାମବାସୀଙ୍କ ମଧ୍ୟରେ ନୀତି ଗଣ୍ଡଗୋଳ ହେଉଛି । ଆଉ ଚିରକୁଟି ଧରି ମହିଳାମାନେ ଲମ୍ବା ଲାଇନ୍ ଲଗାଇ ନଳକୂପରୁ ପାଣି ନେଉଛନ୍ତି।
ଦିନକୁ ମାତ୍ର ୧୦ ପରିବାରକୁ ପାଣି ମିଳୁଥିବାରୁ ଗ୍ରାମବାସୀ ପାନୀୟ ଜଳ ପାଇଁ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ତେବେ ଏହି ଖବର ଜାଣିବା ପରେ ରାୟଗଡା ବ୍ଲକ ପ୍ରଶାସନ ଗାଁରେ ପହଞ୍ଚି କାମଚଳା ନ୍ୟାୟରେ ମରାମତି ସାରିଥିଲେ ସୁଦ୍ଧା ଗ୍ରୀଷ୍ମ ଦିନରେ ଜଳସ୍ତର ହ୍ରାସ ଯୋଗୁଁ ପାଣି ଥିଲେ ସିନା ମିଳିବ ବୋଲି ଆଭିଯୋଗ କରିଛନ୍ତି ଗ୍ରାମବାସୀ । ତୁରନ୍ତ ଏଠାରେ ନୂଆ ନଳକୂପ ଖନନ କରାନ ଗଲେ ପରିସ୍ଥିତି ଗାଁ ଲୋକଙ୍କ ପାଇଁ ଦୁର୍ବିସହ ହୋଇପଡିବ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
