ରାୟଗଡ଼ା: ଚନ୍ଦ୍ରପୁର ଗ୍ରାମର ଷଷ୍ଠ ଶ୍ରେଣୀର ନାବାଳିକା ଛାତ୍ରୀକୁ ଅପହରଣ ପରେ ହତ୍ୟା ଘଟଣାକୁ ନେଇ ଅଞ୍ଚଳରେ ଦାନା ବାନ୍ଧବାରେ ଲାଗିଛି ଅଶାନ୍ତି । ଏହି ଘଟଣାକୁ ଇତିମଧ୍ୟରେ ୨୪ ଦିନ ବିତିଯାଇଥିଲେ ମଧ୍ୟ ପୋଲିସ ଏଯାଏଁ ହତ୍ୟା ମାମଲା ରୁଜୁକରି ତଦନ୍ତ କରୁଥିବା ବେଳେ ନାବାଳିକା ଛାତ୍ରୀକୁ ଦୁଷ୍ମର୍ମ ହୋଇଥିବା ପରିବାର ପକ୍ଷରୁ ଦାବି କରିଛନ୍ତି । ଏହାକୁ ନେଇ ଚନ୍ଦ୍ରପୁର ଅଞ୍ଚଳରେ ତୀବ୍ର ପ୍ରତିକ୍ରିୟା ଦେଖାଦେବା ସହ ଧିରେଧିରେ ଚନ୍ଦ୍ରପୁର ଏବଂ ଏହାର ଅଞ୍ଚଳରେ ଏବେ ଅରମ୍ଭ ହୋଇଛି ଏଦିବାସୀ ମେଳି ।
ଏହି ମେଳିରେ ସ୍ଥାନୀୟ ଲୋକ ପ୍ରତିନିଧିଙ୍କ ସମେତ ବହୁସଂଖ୍ୟାରେ ବିଭିନ୍ନ ଗାଁ ମୁଖିଆ ଯୋଗଦେଇଥିବା ବେଳେ ପୋଲିସର ନିଷ୍କ୍ରିୟତାକୁ ନେଇ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଥିଲା । ଗତ ଡିସେମ୍ବର ୨୧ ତାରିଖରେ ବନ୍ଦରୀ ଗ୍ରାମର ଅଭିଯୁକ୍ତ ସେବା ବାଗସିଂ ଚନ୍ଦ୍ରପୁର ଗ୍ରାମ ଆଦିବାସୀ ସାହିର ଜଣେ ନାବାଳିକା ଷଷ୍ଠ ଶ୍ରେଣୀ ଛାତ୍ରୀକୁ ଘରେ ପହଁଚାଇବା ବାହାନାରେ ବାଇକରେ ଅପହରଣ କରିନେଇଥିଲା ।
ଏନେଇ ପରିବାର ପକ୍ଷରୁ ଚନ୍ଦ୍ରପୁର ଥାନାରେ ଏତଲା ଦେବାପରେ ୨୪ ତାରିଖରେ ଚନ୍ଦ୍ରପୁର ଗ୍ରାମର କିଛି ଦୂରରେ ଜଙ୍ଗଲ ଭିତରୁ ନାବାଳିକାଟିର କ୍ଷତବିକ୍ଷତ ଉଲଗ୍ନ ମୃତଦେହ ଉଦ୍ଧାର ହୋଇଥିଲା । ତେବେ ଏନେଇ ଦୁଷ୍ମର୍ମ ଓ ହତ୍ୟା ମାମଲା ରୁଜୁ କରାଯାଇଥିବା ବେଳେ ଭିସେରା ରାଜ୍ୟ ଫରେନସିକ ଲାବୋରେଟରିକୁ ପଠାଯାଇଛି । ସେଠାରୁ ରିପୋର୍ଟ ଆସିବା ପରେ ଖୁବଶୀଘ୍ର ଚାର୍ଜସିଟ ଦାଖଲ ହେବା ସହ ଏହି ମାମଲାକୁ ସ୍ପେଶାଲ ରେଡ ଫ୍ଲାଗ ଶ୍ରେଣୀଭୁକ୍ତ କରାଯାଇଛି ବୋଲି କହିଛନ୍ତି ରାୟଗଡ଼ା ଏସପି ।
ରାୟଗଡ଼ାରୁ ରଞ୍ଜନ ରଥ, ଇଟିଭି ଭାରତ
