ରାୟଗଡା: ରଥ ପ୍ରସ୍ତୁତ, ପଥ ମଧ୍ୟ ପ୍ରସ୍ତୁତ ହେଲେ ଚକରେ ପଡିଲା କୋରୋନା ବେଢି । ଆଉ ଗଡିବନି ରଥ କି ହେବନି କାଳିଆ ସାଆନ୍ତଙ୍କ ଶ୍ରୀଗୁଣ୍ଡିଚା ଯାତ । ରଥ ପ୍ରସ୍ତୁତ ସତ୍ତ୍ବେ ଭାବର ଠାକୁରଙ୍କୁ ଘରୁ ବାହାରିବାରେ ପ୍ରତିବନ୍ଧକ ଲଗାଇଛି ପ୍ରଶାସନ । ଏଭଳି ନିଷ୍ପତ୍ତି ହୋଇଛି ରାୟଗଡାରେ ।
ଆସନ୍ତା ରଥଯାତ୍ରାରେ ରଥ ଚାଲିବନି କି କାଳିଆ ଠାକୁର ଜନ୍ମବେଦୀକୁ ଯାତ୍ରା ଯିବେନି ଲୀଳାଖେଳା କରିବା ପାଇଁ । କେବଳ ଭକ୍ତ କି ଠାକୁର ନୁହଁ ସେବାୟତଙ୍କ ଉପରେ ମଧ୍ୟ କଟକଣା ଜାରି କରିଛି ଜିଲ୍ଲା ପ୍ରଶାସନ । କେଉଁ ଆବାହମାନ କାଳରୁ ରାୟଗଡା ସ୍ଥିତ ଶ୍ରଦ୍ଧା ଶ୍ରୀକ୍ଷେତ୍ରଠାରେ ରଥଯାତ୍ରା ହୋଇ ଆସୁଥିଲା । ଏହି ଯାତ୍ରାରେ ହଜାର ହଜାର ସଂଖ୍ୟାରେ ଭକ୍ତଙ୍କ ଭିଡ ଜମୁଥିଲା । ହେଲେ ଚଳିତବର୍ଷ ଆଉ ରଥଟଣା କାର୍ଯ୍ୟକ୍ରମ ହୋଇପାରିବ ନାହିଁ ବୋଲି ଜିଲ୍ଲାପାଳଙ୍କ ସୂଚନା ପରେ ଭକ୍ତ ଓ ସେବାୟତଙ୍କ ମହଲରେ ତୀବ୍ର ପ୍ରତିକ୍ରିୟା ଦେଖାଦେଇଛି । ମଣିଷକୁ ସାଙ୍ଗରୋଧରେ ରଖୁଥିବା ମଣିଷ ଆଜି ସୃଷ୍ଟି ନିୟନ୍ତ।ଙ୍କୁ ମଧ୍ୟ ସଙ୍ଗରୋଧରେ ରଖିବା ପ୍ରୟାସ ସହଜରେ ଗ୍ରହଣ କରିପାରୁନି ସାଧାରଣ ଭକ୍ତଟିଏ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
