ରାୟଗଡା: ରାୟଗଡା ସହର ନୂଆ ସାହି ନିକଟରେ ଏକ ନର କଙ୍କାଳ ଉଦ୍ଧାର କରିଛି ରାୟଗଡା ପୋଲିସ । ଘଟଣାସ୍ଥଳରେ ରାୟଗଡା ଏସପି ଓ ସାଇଣ୍ଟିଫିକ୍ ଟିମ ପହଞ୍ଚି ତନାଘନା ଆରମ୍ଭ କରିଛି ।
ଛାନଭିନ ବେଳେ ଘଟଣାସ୍ଥଳରୁ ଏକ ମନିପର୍ସ ଓ 2ଟି ବ୍ୟାଗ ଠାବ କରାଯାଇଥିଲା । ପର୍ସରେ 4ର୍ଥ ବାଟାଲିୟନର ସିଆରପିଏଫ୍ ଜବାନ ଧରମ ଦେବଙ୍କ ଆଧାର କାର୍ଡ ଓ 2ଟି ବ୍ୟାଗରୁ ତାଙ୍କର ସିଆରପିଏଫ ଡ୍ରେସ ଓ କିଛି ଘର ପିନ୍ଧା ଡ୍ରେସ ମିଳିଛି ।
ତେବେ ଉଦ୍ଧାର ଗଳିତ କଙ୍କାଳ ଧରମ ଦେବଙ୍କ ବୋଲି ସଠିକ୍ ଭାବେ ଚିହ୍ନଟ ହୋଇନଥିଲେ ମଧ୍ୟ ତଥାପି ପାରିପାର୍ଶ୍ବିକ ସ୍ଥିତିରୁ କଙ୍କାଳଟି ତାଙ୍କର ବୋଲି ସନ୍ଦେହ କରାଯାଇଛି । ସେପଟେ ଘଟଣାସ୍ଥଳରେ ସିଆରପିଏଫର ସହକାରୀ କମାଣ୍ଡମେଣ୍ଟ ଏସକେ ଠାକୁର ପହଞ୍ଚି ଧରମ ଦେବଙ୍କ ପରିଚୟ ପତ୍ର, ଆଧାରକାର୍ଡ ଓ ଡ୍ରେସକୁ ଚିହ୍ନଟ କରିଛନ୍ତି । ତେବେ ଏହା ଏକ ସୁକଳ୍ପିତ ହତ୍ୟାକାଣ୍ଡ ବୋଲି ଅନୁମାନ କରି ସାଇଣ୍ଟିଫିକ୍ ଟିମ ଓ ସ୍ନାପର ଡଗ୍ର ସହାୟତା ନେଇଛି ପୋଲିସ । ସୂଚନାଯୋଗ୍ୟ, ଗତ ଜାନୁଆରୀ 2 ତାରିଖରୁ ସିଆରପିଏଫ ଯବାନ ଧରମ ଦେବ ନିଖୋଜ ଥିଲେ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
