ରାୟଗଡା: କୋରୋନା ସଂକ୍ରମଣକୁ ଆଖିଆଗରେ ରଖି ରାଜ୍ୟ ସରକାର ବିଭିନ୍ନ ପ୍ରସିଦ୍ଧ ଶୈବ ପୀଠ ଓ ଶିବାଳୟ ଗୁଡିକରେ ମହା ଶିବରାତ୍ରୀ ଦିନ ଭକ୍ତଙ୍କ ସମାଗମ ପ୍ରବେଶ ଉପରେ ରୋକ ଲଗେଇଛନ୍ତି । ଏହାସହ ରାୟଗଡା ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲାର କୌଣସି ଶିବାଳୟରେ ଏହି ଦିନ ଭକ୍ତଙ୍କ ପ୍ରବେଶକୁ ବାରଣ କରାଯାଇଥିବା ବେଳେ ପୂଜକଙ୍କ ଦ୍ବାରା କେବଳ ନୀତିକାନ୍ତି କରିବାକୁ ନିର୍ଦ୍ଦେଶନାମା ଜାରୀ କରାଯାଇଛି । କିନ୍ତୁ ଏହାକୁ ତୀବ୍ର ବିରୋଧ କରିଛନ୍ତି ଗୁଣୁପୁରର ପୂଜକ ସମ୍ପ୍ରଦାୟ । ଭକ୍ତଙ୍କ ଭାବାବେଗକୁ ସରକାର ଗୁରୁତ୍ବ ଦେବା ଉଚିତ ।
କଟକଣା ମଧ୍ୟରେ ଭକ୍ତଙ୍କୁ ମନ୍ଦିର ପ୍ରବେଶ ପାଇଁ ଅନୁମତି ଦିଆଯାଉ ବୋଲି ଗୁଣୁପୁର ଉପଜିଲ୍ଲାପାଳଙ୍କ ଜରିଆରେ ଏକ ସ୍ମାରକପତ୍ର ଜିଲ୍ଲାପାଳଙ୍କ ଉଦ୍ଦେଶ୍ୟରେ ପ୍ରଦାନ କରାଯାଇଛି । ବର୍ଷସାରା ମଠ ମନ୍ଦିର ବନ୍ଦ ରହିଥିବା ବେଳେ ଏବେ ମୁଖ୍ୟ ପର୍ବ ପର୍ବାଣୀ ଉପରେ କଟକଣା ଜାରି କରିବା ଯୋଗୁଁ ପେଟ ପାଟଣା ଉପରେ ପ୍ରଭାବ ପଡୁଥିବା ପୂଜକ ସମ୍ପ୍ରଦାୟ କହିଛନ୍ତି ।
ରାୟଗଡ଼ାରୁ ରଞ୍ଜନ କୁମାର ରଥ, ଇଟିଭି ଭାରତ
