ରାୟଗଡ଼ା: କଲ୍ୟାଣସିଂହପୁର ବ୍ଲକ ସୁନାଖଣ୍ଡି ପଞ୍ଚାୟତ ନିୟମଗିରି ପାହାଡ଼ ଅଞ୍ଚଳ ରାଇଲିମା ଗାଁର ୧୪ ନମ୍ବର ମତଦାନ କେନ୍ଦ୍ରରେ ଆଜି ସାନି ମତଦାନ ଅନୁଷ୍ଠିତ ହୋଇଯାଇଛି । ଭୋଟର ତାଲିକାରେ ନାଁ ନଥିବାରୁ ଡଙ୍ଗରିଆ କନ୍ଧ ବାକ୍ସ ଉଠାଇ ନେବା ପରେ ବନ୍ଦ ଥିଲା ମତଦାନ । ତେବେ ପୁଣି କଡ଼ା ସୁରକ୍ଷାରେ ଏଠାରେ ଶେଷ ହୋଇଛି ପୁନଃ ଭୋଟଗ୍ରହଣ ।
କେନ୍ଦ୍ରରେ ମୋଟ ୧୯୯ ଜଣ ଭୋଟରଙ୍କ ମଧ୍ୟରୁ ୧୫୦ ଖଣ୍ଡ ଭୋଟ ପଢ଼ିଛି। ଏହି ଅଞ୍ଚଳ ଅତି ମାଓପ୍ରବଣ ଅଞ୍ଚଳ ହୋଇଥିବାରୁ ଏଠାରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଏହା ସହିତ କୁମ୍ଭିଂ ଅପରେସନକୁ ଜୋରଦାର କରାଯାଇଛି । ଭୋଟର ତାଲିକାରେ ନାମା ନଥିବା ପ୍ରତିବାଦରେ ଭୋଟ ବାକ୍ସ ଉଠାଇ ନେଇ ଯାଇଥିଲେ ଆଦିମ ଜନଜାତି ଡ଼ଙ୍ଗରିଆ କନ୍ଧ । ଫଳରେ ଏଠାରେ ପୁଣି ମତଦାନ କରାଯାଇଛି ।
ଏହା ବି ପଢନ୍ତୁ: Panchayat Poll: ଭୋଟ ତାଲିକାରେ ନା ନଥିବାରୁ ଡଙ୍ଗରିଆଙ୍କ ଆନ୍ଦୋଳନ, ଧର୍ମେନ୍ଦ୍ରଙ୍କ ଚିନ୍ତା
ତେବେ ତୃତୀୟ ପର୍ଯ୍ୟାୟ ମତଦାନ ବେଳେ ଭୋଟର ତାଲିକାରେ ଉପର ମୁଶୁଡି ଓ ତଳ ମୁଶୁଡ଼ି ଗାଁର ପ୍ରାୟ ୧୦୦ ଜଣଙ୍କ ଭୋଟ ତାଲିକାରେ ନାମ ନଥିଲା । ସେହି ପ୍ରତିବାଦରେ ଭୋଟ ବାକ୍ସକୁ ଉଠାଇ ନେଇଯାଇଥିଲେ ଡଙ୍ଗରିଆ କନ୍ଧ ସମ୍ପ୍ରଦାୟ । ବର୍ତ୍ତମାନର ସୂଚନା ଅନୁସାରେ ତଳ ମୁଶୁଡି ଓ ଉପର ମୁଶୁଡି ଦୁଇଟି ଗାଁର ୭୦ ଜଣଙ୍କ ନାମ ଭୋଟର ତାଲିକାରେ ଅନ୍ତର୍ଭୁକ୍ତ କରାଯାଉଛି । ପୂର୍ବେ ଭୁଲବଶତଃ ଏହି ତାଲିକାରେ ସେମାନଙ୍କର ନାମ ନଥିଲା ।
ରାୟଗଡ଼ାରୁ ରଞ୍ଜନ କୁମାର ରଥ, ଇଟିଭି ଭାରତ
