ରାୟଗଡା: ଜିଲ୍ଲାରେ କୋରୋନା ସଂକ୍ରମଣ ମାମଲା ଦିନକୁ ଦିନ ବଢିବାରେ ଲାଗିଛି । ଶୁକ୍ରବାର ରାୟଗଡ଼ା ଜିଲ୍ଲାରେ ୧୫୪ ନୂଆ କୋରୋନା ସଂକ୍ରମଣ ମାମଲା ସାମ୍ନାକୁ ଆସିଛି । ଦିନକୁ ଦିନ ଜିଲ୍ଲାରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢୁଥିବାରୁ ଜିଲ୍ଲାବାସୀଙ୍କ ମଧ୍ୟରେ ଭୟର ବାତାବରଣ ରହିଛି । ତେବେ ଟେଷ୍ଟିଂ ସଂଖ୍ୟା ବଢିଥିବାରୁ ଆକ୍ରାନ୍ତଙ୍କ ସଂଖ୍ୟା ମଧ୍ୟ ବଢୁଛି । ବର୍ତ୍ତମାନ ଜିଲ୍ଲାରେ ଦୈନିକ ୧୫୦୦ ଟେଷ୍ଟିଂ ହେଉଛି ।
ଜୁଲାଇ ୨୬ ପୂର୍ବରୁ ଜିଲ୍ଲାରେ ଟେଷ୍ଟିଂର ୨୫ ପ୍ରତିଶତ ପିଜିଟିଭ୍ ଚିହ୍ନଟ ହେଉଥିବା ବେଳେ ବର୍ତମାନ ତାହା ୧୨ ରୁ ୧୪ ପ୍ରତିଶତକୁ ଖସିଛିଥିବା କୋଭିଡ ନୋଡାଲ ଅଧିକାରୀ ଅମୃତ ଋତୁରାଜ ପ୍ରକାଶ କରିଛନ୍ତି । ଆସନ୍ତା ପର୍ଯ୍ୟାୟରେ ପ୍ରଶାସନ ପକ୍ଷରୁ ପରିବା ଦୋକାନୀ, ରାସନ ଦୋକାନୀ, ଆମିଷ ଦୋକାନୀ, ସେଲୁନ, ଅଟୋ ବାଲ, କ୍ଷୀର ବାଲଙ୍କୁ ଚିହ୍ନଟ କରି କୋଭିଡ ପରୀକ୍ଷଣ କରାଯିବ । ଯଦି ସେମାନଙ୍କ ଭିତରୁ କେହି ଆକ୍ରାନ୍ତ ଚିହ୍ନଟ ହୁଅନ୍ତି ତେବେ ସେମାନଙ୍କୁ ସଙ୍ଗରୋଧରେ ରଖାଯିବ ଏବଂ କୋରୋନା ସଂକ୍ରମଣକୁ ରୋକାଯାଇପାରିବ ବୋଲି ଋତୁରାଜ ପ୍ରକାଶ କରିଛନ୍ତି ।
ତେବେ ଆଜି ଚିହ୍ନଟ ହୋଇଥିବା ୧୫୪ ଆକ୍ରାନ୍ତଙ୍କ ମଧ୍ୟରୁ ୯୮ ଜଣ ପୁରୁଷ ଥିବା ବେଳେ ୫୬ ଜଣ ମହିଳା ଅଛନ୍ତି । ସମସ୍ତ ଆକ୍ରାନ୍ତ ଘରେ ସଙ୍ଗରୋଧରେ ରହୁଥିଲେ । ତେବେ ସେମାନଙ୍କ ମଧ୍ୟରୁ ୧୨୫ ଜଣ ପୂର୍ବରୁ ଆକ୍ରାନ୍ତ ହୋଇଥିବା ବ୍ୟକ୍ତିଙ୍କ ସଂସ୍ପର୍ଶରେ ଆସିଥିଲେ । ଅନ୍ୟପକ୍ଷରେ ୫ ଜଣ କରୋନା ଯୋଦ୍ଧା କୋରୋନାରେ ଆକ୍ରାନ୍ତ ହୋଇଛନ୍ତି । ବର୍ତମାନ ସୁଦ୍ଧା ଜିଲ୍ଲାରୁ ୩୮୪ ଜଣ କୋଭିଡ ଯୋଦ୍ଧା କୋରୋନାରେ ଆକ୍ରାନ୍ତ ହୋଇଥିବା ବେଳେ ୨୨୫ ଜଣ ସୁସ୍ଥ ହୋଇଛନ୍ତି ଏବଂ ୧୫୯ ଜଣ ଚିକିତ୍ସିତ ହେଉଛନ୍ତି ।
ଆଜି ଚିହ୍ନଟ ହୋଇଥିବା ୧୫୪ ଜଣଙ୍କ ମଧ୍ୟରୁ ରାୟଗଡା ପୌରାଞ୍ଚଳରୁ ୨୨, ରାୟଗଡ଼ା ଗ୍ରାମାଞ୍ଚଳରୁ ୧୫, ଗୁଣପୁର ପୌରାଞ୍ଚଳରୁ ୫, ଗୁଣପୁର ଗ୍ରାମାଞ୍ଚଳରୁ ୧୦, ଚନ୍ଦ୍ରପୁରରୁ ୩୪, ଗୁଡାରୀରୁ ୨୩, କାଶିପୁରରୁ ୨୧, ପଦ୍ମପୁରରୁ ୧୪, ରାମନାଗୁଡାରୁ ୯ ଏବଂ କଲ୍ୟାଣସିଂହପୁରରୁ ଜଣେ ଚିହ୍ନଟ ହୋଇଛନ୍ତି । ତେବେ ଏହାକୁ ମିଶାଇ ଜିଲ୍ଲାରେ କୋରୋନା ଆକ୍ରାନ୍ତଙ୍କ ସଂଖ୍ୟା ୨୮୧୬ ରେ ପହଞ୍ଚିଛି । ସେହିପରି ୧୪୮୯ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ସେପଟେ କୋରୋନା ଜନିତ ମୃତ୍ୟୁ ସଂଖ୍ୟା ୧୭ କୁ ପହଞ୍ଚିଛି।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
