ରାୟଗଡ଼ା: ତାଲା ବନ୍ଦ ସମୟରେ ରାୟଗଡା ସହରରେ ଭଡା ଗୃହ ନେଇ ଦୋକନା କରୁଥିବା ବ୍ୟବସାୟୀ ମାନଙ୍କୁ ସହାୟତା ପ୍ରଦାନ କରିବା ପାଇଁ ନଗର ବିଜେପି ପକ୍ଷରୁ ଜିଲ୍ଲା ପ୍ରଶାସନକୁ ଦାବି କରାଯାଇଛି । ତାଲା ବନ୍ଦ ଯୋଗୁଁ ବ୍ୟବସାୟୀ ମାନେ ଅନେକ କ୍ଷତି ସହିଛନ୍ତି । ଭଡାରେ ଦୋକାନ ନେଇ ବ୍ୟବସାୟ କରୁଥିବା ବ୍ୟବସାୟୀଙ୍କୁ ଅନେକ ସମସ୍ୟା ଦେଇ ଗତି କରିବାକୁ ପଡୁଛି ।
ଗୋଟିଏ ପଟେ ବ୍ୟବସାୟ ହେଉନଥିବା ବେଳେ ଦୋକାନ ମାଲିକ ମାନେ ଜୋର ଜବରଦସ୍ତ ଦୋକାନ ଗୃହର ଭଡା ନେଉଛନ୍ତି । ସେହିପରି ଦୋକାନ ଖୋଲାଯାଉନଥିଲେ ମଧ୍ୟ ନିର୍ଦ୍ଧାରିତ ସମୟ ମଧ୍ୟରେ ବିଦ୍ୟୁତ୍ ବିଲ୍ କିନ୍ତୁ ନିୟମିତ ପୈଠ କରିବାକୁ ପଡୁଛି ବୋଲି ବିଜେପି ଅଭିଯୋଗ କରିଛି ।
ଅନ୍ୟପଟେ ସହରର ଅନେକ ଛୋଟ ଛୋଟ ବ୍ୟବସାୟୀ ବ୍ୟବସାୟ କରିବା ପାଇଁ ହାତ ଉଧାର ଓ ବ୍ୟାଙ୍କ ସହାୟତାରେ ଋଣ ଆଣିଥିବା ବେଳେ ନିୟମିତ ମାସିକ କିସ୍ତି ପୈଠ କରିବାକୁ ପଡୁଛି । ତେବେ ମହାମାରୀ ସମୟରେ ଛୋଟ ଛୋଟ ବ୍ୟବସାୟୀ ମାନେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ତେଣୁ ସେମାନଙ୍କୁ ସହାୟତା ଦେବା ସହ ଋଣ ବାବଦକୁ କିସ୍ତି ବନ୍ଦ କରିବା ପାଇଁ ପ୍ରଶାସନ ବ୍ୟବସ୍ଥା କରୁ ବୋଲି ବିଜେପି ଦାବି କରିଛି ।
ରାୟଗଡା ନଗର ବିଜେପି ସଭାପତି ଶ୍ୟାମ କୁମାର ଦାସଙ୍କ ନେତୃତ୍ବରେ ମଙ୍ଗଳବାର ଦଳୀୟ କର୍ମକର୍ତ୍ତା ମାନେ ରାୟଗଡ଼ା ଜିଲ୍ଲାପାଳଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲ୍ଲାପାଳ ଶରତ ଚନ୍ଦ୍ର ପଣ୍ଡାଙ୍କୁ ଏକ ଦାବି ପତ୍ର ପ୍ରଦାନ କରିଛନ୍ତି ।
ରାୟଗଡ଼ାରୁ ରଞ୍ଜନ ରଥ, ଇଟିଭି ଭାରତ
