ରାୟଗଡା: ମହାମାରୀ କୋରୋନାର ସଂକ୍ରମଣ ରୋକିବା ପାଇଁ ସାମାଜିକ ଦୂରତ୍ୱ ଏକମାତ୍ର ବିକଳ୍ପ ହୋଇଥିବା ବେଳେ ରାୟଗଡା ସହରରେ ଏହାର ଖୋଲାଖୋଲି ଉଲ୍ଲଂଘନ ଦେଖିବାକୁ ମିଳିଛି ।
ଆଜି ତିନି ମାସର ରାସନ ସହ ଭତ୍ତା ନେବା ପାଇଁ ସହରର ମୈତ୍ରୀ ଦୋକାନ ଆଗରେ ଶହଶହ ଲୋକଙ୍କ ଭିଡ ଲାଗିଛି । କେବଳ ମୈତ୍ରୀ ଷ୍ଟୋର ନୁହେଁ ବରଂ ସହରର ୨୪ ଟି ୱାର୍ଡରେ ଥିବା ସବୁ ସରକାରୀ ସୁଲଭ ମୁଲ୍ୟ ଦୋକାନରେ ଏକା ଚିତ୍ର । କେହି ଯେପରି ଏହି ନିୟମକୁ ମାନିବାକୁ ନାରାଜ୍ । କେଉଁଠି ଲୋକେ ଠେଲାପେଲା ହୋଇ ଭତ୍ତା ଟଙ୍କା ନେଉଛନ୍ତି ତ ପୁଣି କେଉଁଠି ତିନି ମାସର ଚାଉଳ ପାଇଁ ଭିଡ଼ ଜମାଉଛନ୍ତି ।
ତେବେ ହାତ ଗଣତି କର୍ମଚାରୀମାନେ ମଧ୍ୟ କୌଣସି ପ୍ରତିବାଦ କରିବାର ସାହାସ ନାହିଁ । ସେମାନେ ମଧ୍ୟ ଅନାୟସରେ ଭତ୍ତା ସହ ଚାଉଳ ବାଣ୍ଟି ଚାଲିଛନ୍ତି । ଗହଳି ଦେଖି ପୋଲିସର ହସ୍ତକ୍ଷେପ ପରେ ମଧ୍ୟ ଅବସ୍ଥା ଯେମିତିକୁ ସେମିତି । ପରିସ୍ଥିତି ଏଭଳି ହୋଇଛି ଯେ ଭିଡ ନିୟନ୍ତ୍ରଣ କରି ନପାରି ମୈତ୍ରୀ ଦୋକାନୀ ରାସନ ଦେବା ବନ୍ଦ କରିଦେଇଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
