ରାୟଗଡା: ରାୟଗଡ଼ା ପୁଲିସ ନିକଟରେ ଆତ୍ମସମର୍ପଣ କରିଛି ଛତିଶଗଡ଼ ବିଜାପୁର ଜିଲ୍ଲାର ମହିଳା ମାଓବାଦୀ ପାର୍ବତୀ ପାଣ୍ଡ୍ରୁ ଓରଫ ରିଙ୍କି । ସେ ନିଜ ଦୁଇମାସ ଶିଶୁ କନ୍ୟା ସହ ରାୟଗଡ଼ା ଏସପିଙ୍କ ନିକଟରେ ଆତ୍ମସମର୍ପଣ କରିଛି । ପାର୍ବତୀ ୨୦୧୧ ମସିହାରୁ ଘୁମୁଷର -ନାଗାବଳୀ -ବାଂଶଧାରା ଡ଼ିଭିଜନ ଅନ୍ତର୍ଗତ ଇନ୍ଦ୍ରାବତୀ ଦଳରେ ପ୍ରଥମେ ଯୋଗଦେଇଥିଲା ।
ସୂଚନା ଅନୁସାରେ, ପରବର୍ତ୍ତୀ ସମୟରେ ଘୁମୁଷର ଦଳରେ ଯୋଗ ଦେଇଥିଲେ । ଏହି ସମୟରେ ସେ ଅନେକ ମାଓ ହିଂସାରେ ସମ୍ପୃକ୍ତି ଥିଲା । ଏହାସହ ରାୟଗଡ଼ା ଜିଲ୍ଲାର ୫ ଟି ଏବଂ କଳାହାଣ୍ଡି ଜିଲ୍ଲାର ୩ ଟି ପ୍ରମୁଖ ମାଓ ଘଟଣାରେ ଜଡ଼ିତ ଥିଲା ।
ଏଗୁଡ଼ିକ ମଧରୁ ୨୦୧୩ ସେପ୍ଟେମ୍ବର ୧୧ ତାରିଖରେ ରାୟଗଡ଼ା ଜିଲ୍ଲାର କାଡ୍ରାକାବଣ୍ଡଲି ଠାରେ ପୁଲିସ ସହ ଗୁଳିବିନିମୟ, ୨୦୧୪ ଜାନୁୟାରୀ 31ରେ ଧାମଣପଙ୍ଗାରେ ଗୁଳିବିନିମୟ ଓ ଡ଼ଙ୍ଗାମାଟିରେ ମଧ୍ୟ ପୁଲିସ ସହ ଗୁଳିବିନିମୟ ଘଟଣାରେ ସମ୍ପୃକ୍ତ ଥିଲା ସେ । ଗୁରୁବାର ସାମ୍ବାଦିକ ସମ୍ମିଳନୀରେ ରାୟଗଡ଼ା ଏସପି ଡ଼. ଶର୍ବଣ ବିବେକ ଏମଙ୍କୁ ସୂଚନା ଦେଇଛନ୍ତି ।
ସେହିପରି ୧୮ ମାର୍ଚ୍ଚ 2016ରେ ରାୟଗଡ଼ା ଜିଲ୍ଲା ନିୟମଗିରି ପାଦଦେଶରେ ଏସଓଜି ଟିମ ଉପରେ ଆକ୍ରମଣ, ୯ ଏପ୍ରିଲ ୨୦୧୮ରେ ସେହି ନିୟମଗିରି ପାହାଡ଼ର ଶକଟା ନିକଟରେ ଡ଼ିଭିଏଫ ଯବାନଙ୍କୁ ବୋମା ବିସ୍ଫୋରଣ କରି ହତ୍ୟା କରିଥିଲେ । ଏହାସହ କଳାହାଣ୍ଡି ଜିଲ୍ଲାରେ ଚଳିତ ବର୍ଷ ଜୁଲାଇ ୨୧ ତାରିଖରେ ପାହାଡ଼ପଦର ଠାରେ ରାଜେନ୍ଦ୍ର ସାହୁଙ୍କୁ ହତ୍ୟା ଓ ସେହିଦିନ ବୁଡ଼ୁପଦର ଠାରେ ଭୀମ ଦୋରାଙ୍କୁ ହତ୍ୟା ସମେତ ୨୪ ତାରିଖରେ ପୁଣି କଳାହାଣ୍ଡି ଜିଲ୍ଲାର ବିଜାପୁର ଥାନା ଅନ୍ତର୍ଗତ ରାହୁଳାଡ଼ିମିରି ଠାରେ ପୁଲିସ ସହ ଗୁଳି ବିନିମୟ ଘଟଣାରେ ପାର୍ବତୀ ଜଡିତ ଥିବା ଏସପି କହିଛନ୍ତି ।
ତେବେ ସେ ମାଓ ସଙ୍ଗଠନ ବାଘୁନା ଡ଼ିଭିଜନର ଏସିଏମ୍ ରାଜୁଙ୍କୁ ବିବାହ କରିବା ପରେ ଗତ ଦୁଇ ମାସ ତଳେ ଏକ କନ୍ୟା ସନ୍ତାନର ଜନନୀ ହୋଇଥିଲେ । ପାର୍ବତୀଙ୍କ କହିବା ଅନୁସାରେ, ମହିଳା ନକ୍ସଲ ଗର୍ଭବତୀ ହେବା ପରେ ପରିତ୍ୟକ୍ତ ଭାବେ ଛାଡ଼ିଦେବା, ଆଦିବାସୀଙ୍କ ସ୍ବାର୍ଥପାଇଁ କିଛି ନକରିବା, ଲିଙ୍ଗଗତ ଭେଦଭାବ ବୃଦ୍ଧି ପାଇଥିଲା । ମାଓ ସଙ୍ଗଠନରେ ମହିଳାଙ୍କୁ ନିଜ ମତ ଉପସ୍ଥାପନ କରିବା ଅଧିକାରରୁ ବଞ୍ଚିତ କରିବା ଏବଂ ମହିଳା ମାଓବାଦୀଙ୍କୁ ସୁରକ୍ଷା ମିଳୁନଥିବା କାରଣରୁ ପାର୍ବତୀ ସଙ୍ଗଠନ ଛାଡ଼ି ପୁଲିସ ନିକଟରେ ଆତ୍ମସମର୍ପଣ କରିଥିବା କହିଛନ୍ତି ରାୟଗଡ଼ା ଏସପି ଡ଼. ଶର୍ବଣ ବିବେକ ଏମ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
