ରାୟଗଡା: ‘ମୁଁ ଜଣେ ଗରିବ । ଏଠି 17 ଦିନ ଧରି ଝିଅକୁ ନ୍ୟାୟ ଦେବା ପାଇଁ ଚେଷ୍ଟା କଲି । କିନ୍ତୁ ପାରିଲି ନାହିଁ , ତେଣୁ ମୋତେ ଝିଅକୁ ନେଇ ଗାଁକୁ ଯିବାକୁ ଦିଅନ୍ତୁ’ ବୋଲି କୋହଭରା କଣ୍ଠରେ ଝାଡଖଣ୍ଡରୁ ଆସିଥିବା ଜଣେ ପିତା କହିଛନ୍ତି । ନିଜ ଝିଅର ପ୍ରେମିକଙ୍କ ଘର ଆଗରେ ଉଭୟ ବାପଝିଅ ଦୀର୍ଘଦିନ ଧାରଣା ଦେବାପରେ ସେ କହିଛନ୍ତି । ଏହି ଘଟଣା ଦେଖିବାକୁ ମିଳିଛି ଶେଷଖାଲ ଥାନା ଅଞ୍ଚଳରେ । ଦୀର୍ଘଦିନର ପ୍ରେମ ସମ୍ପର୍କ ପରେ ପ୍ରତାରଣାର ଶିକାର ହୋଇଥିବା ପ୍ରେମିକା ବାଧ୍ୟ ହୋଇ ପ୍ରେମିକ ଘର ଆଗରେ ଧାରଣା ଦେଇଛି । ଏହାକୁ ନେଇ ଥାନାରେ ମୀମାଂସା ବଦଳରେ ମାରପିଟ ହୋଇଥିବା ଦେଖିବାକୁ ମିଳିଛି ।
ସୂଚନା ଅନୁସାରେ, ପୀଡିତା ଜଣକ ଘରୋଇ କଲେଜରେ ଇଞ୍ଜିନିୟରିଂ କରିବାକୁ ଆସି କଲେଜର ଅଧ୍ୟାପକ ବୀରେନଙ୍କ ସହ ପ୍ରେମରେ ପଡିଥିଲେ । ଉଭୟ ପରିବାର ପ୍ରେମ ସମ୍ପର୍କ ବିଷୟରେ ଜାଣିବା ପରେ ବିବାହ ପାଇଁ ରାଜି ହୋଇଥିଲେ । କିନ୍ତୁ ପୁଅଙ୍କ ପରିବାର ଯୌତୁକ ବାବଦରେ 5 ଲକ୍ଷ ଟଙ୍କା ମାଗିବାରୁ ପୀଡିତାର ବାପା ଅକ୍ଷମ ହୋଇଥିଲେ । ପରେ ଭିରେନର ଅନ୍ୟତ୍ର ବିବାହ ସ୍ଥିର ହେବାପରେ ଝିଅ ପକ୍ଷ ନ୍ୟାୟ ପାଇଁ ଥାନାରେ ଦ୍ବାରସ୍ଥ ହୋଇଛନ୍ତି ।
ତେବେ ଆଜି ଥାନାରେ ସମାଧାନ ପାଇଁ ବସିଥିବା ବେଳେ ଯୁକ୍ତିତର୍କ ପରେ ଉଭୟ ପକ୍ଷ ମଧ୍ୟରେ ହାତାହାତି ହୋଇଛନ୍ତି । ଯାହାକୁ ନେଇ ପୀଡିତା ବାପା ଏଠାରେ କୌଣସି ନ୍ୟାୟ ମିଳିବନି ଜାଣି ନିଜ ରାଜ୍ୟକୁ ଫେରିଯିବେ ବୋଲି କହିଛନ୍ତି । ସେପଟେ ପୁଲିସ ଉଭୟ ପକ୍ଷଙ୍କୁ ବୁଝାସୁଝା କରି ଦୁଇଟି ମାମଲା ରୁଜୁ କରିବା ସହ ତଦନ୍ତ ଜାରିଥିବା ରାୟଗଡା ଏସଡିପିଓ କହିଛନ୍ତି ।
ରାୟଗଡାରୁ ରଞ୍ଜନ ରଥ, ରାୟଗଡା
