ରାୟଗଡା: ଇନଷ୍ଟାକାର୍ଟ ଶାଖାରୁ ଚୋରି ଘଟଣାରେ ଜଣେ ଗିରଫ ହୋଇଛି । ଏହାସହ ସାତ ଲକ୍ଷ ସହ ଦୁଇଟି ବାଇକକୁ ଜବତ କରିଛି ପୋଲିସ । ରାୟଗଡା ସହରର ଏଫସିଆଇ ଛକ ନିକଟରେ ଥିବା ଇନଷ୍ଟାକାର୍ଟ ଅନଲାଇନ ସାମଗ୍ରୀ ପ୍ରଦାନ ଶାଖାରୁ କେହି ଦୁର୍ବୃତ୍ତ ଶାଖା ଅଫିସ ଗୋଦାମରୁ ସଟର ଭାଙ୍ଗି ୧୨ ଲକ୍ଷ ଟଙ୍କା ଚୋରି ହୋଇଥିଲା । ଏନେଇ ରାୟଗଡ ଥାନାରେ ଇନଷ୍ଟାକାର୍ଟ ଶାଖାର ସିନିୟର ଅପରେସନ ଏଜକ୍ୟୁଟିଭ ପିକାଲା ଲକ୍ଷ୍ମୀ ନାରାୟଣ ଅଭିଯୋଗ କରିଥିଲେ। ଅଭିଯୋଗ ପରେ ଘଟଣାର ତଦନ୍ତ ଆରମ୍ଭ କରିଥିଲା ପୋଲିସ ।
ଏ ଘଟଣାରେ ଅଭିସିରାଓ ମାଣ୍ଡାଙ୍ଗିକୁ ରାୟଗଡ ସଦର ରୋଇତ କୋଲନିରୁ ଗିରଫ କରିଛି ପୋଲିସ । ଗିରଫ ସହ ୭ଲକ୍ଷ ୭ ହଜାର ୫ଶହ ଟଙ୍କା , ଚୋରି କାର୍ଯ୍ୟରେ ବ୍ୟବହୃତ କିଛି ଲୁହା ଛଡ଼ ଓ ଚୋରିରେ ବ୍ୟବହୃତ ଉପକରଣ ଜବତ ମଧ୍ୟ ହୋଇଛି । ଚୋରି ଟଙ୍କାରେ କିଣିଥିବା ଏକ ବୁଲେଟ ମଟର ସାଇକଲ ସହ ବ୍ୟବହାର କରିଥିବା ଆଉ ଏକ ମଟର ସାଇକଲ ମଧ୍ୟ ପୋଲିସ ହାତରେ ଲାଗିଛି । ଗିରଫ ଯୁବକ ସେସଖାଲ ଥାନା ଅନ୍ତର୍ଗତ ନନ୍ଦାବାଡି ଗ୍ରାମର ବୋଲି ରାୟଗଡ ଆରକ୍ଷୀ ଅଧିକ୍ଷକ ବିବେକା ନନ୍ଦ ଶର୍ମା ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ତେବେ ଏହି ଡକାୟତିରେ ଅଭିସିରାଓ ମାଣ୍ଡାଙ୍ଗି ଜେନ ସମ୍ପୃକ୍ତ ନା ତା ସହିତ ଆଉ କେଉଁମାନେ ଅଛନ୍ତି ତାର ତଦନ୍ତ ଆରମ୍ଭ କରିଛି ପୋଲିସ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
