ରାୟଗଡା: ମହିଳା ଦିବସରେ ମହିଳାଙ୍କୁ ଜାଳି ପୋଡି ମାରି ଦେଇଥିବା ଅଭିଯୋଗ । ରାୟଗଡା ଜିଲ୍ଲା ଗୁଣୁପୁର ସହରସ୍ଥିତ ମୋତିଲାଲ ନଗରରୁ ଆସିଛି ଏଭଳି ଅଭାବନୀୟ ଘଟଣା । ମୋତିଲାଲନଗରର ଏକ ପରିତ୍ୟକ୍ତ ଡ୍ରେନରୁ ଅର୍ଦ୍ଧ ଦଗ୍ଧ ମହିଳାଙ୍କ ମୃତଦେହ ଉଦ୍ଧାର କରାଯାଇଥିଲା । ଶାଶୂଘର ଲୋକେ ମାରିଦେଇଥିବା ନେଇ ଅଭିଯୋଗ ଆଣିଛନ୍ତି ମହିଳାଙ୍କ ପରିବାର ଲୋକେ । ଏନେଇ ଝିଅ ଘର ଲୋକେ ସ୍ଥାନୀୟ ଗୁଣୁପୁର ପୋଲିସ ଷ୍ଟେସନରେ ଅଭିଯୋଗ ଆଣିଛନ୍ତି ।
ମୋତିଲାଲ ନଗରସ୍ଥିତ ଏକ ନର୍ଦ୍ଧମାରେ ଚିନ୍ନା ଆମୁଲୁଙ୍କ ମୃତଦେହ ପଡିଥିଲା । ଏହି ଖବର ପାଇବା ପରେ ଆନ୍ଧ୍ରପ୍ରଦେଶ ଅନ୍ତର୍ଗତ ହିରମଣ୍ଡଳମ ନିକଟସ୍ଥ ଗାଁରେ ରହୁଥିବା ଚିନ୍ନା ଆମାଲୁଙ୍କ ପରିବାର ଲୋକେ ଘଟଣାସ୍ଥଳରେ ପହଞ୍ଚିଥିଲେ । ଏହା ପରେ ଶାଶୂ ଘର ଲୋକଙ୍କ ନାଁରେ ପରିବାର ଲୋକେ ଥାନାରେ ଅଭିଯୋଗ ଆଣିଥିଲେ ।
ସୂଚନାଯୋଗ୍ୟ, ଚିନ୍ନା ଆମୁଲୁ ଗୁଣପୁର ମୋତିଲାଲ୍ ନଗରସ୍ଥିତ ନିଜ ଶାଶୁ ଘରେ ରହି ଆସୁଥିଲେ । ସମ୍ପର୍କୀୟଙ୍କ ଅଭିଯୋଗ ଅନୁସାରେ, ବହୁ ଦିନ ଶାଶୁ ଘର ଲୋକ ଚିନ୍ନାକୁ ନିର୍ଯ୍ୟାତନା ଦେଉଥିଲେ । ସମୟ ସମୟରେ ସ୍ଵାମୀ ସୂରେଶ କୁମ୍ଭାର ମଧ୍ୟ ମଦ୍ୟପାନ କରି ଚିନ୍ନା ଆମୁଲୁଙ୍କୁ ମାରପିଟ୍ କରୁଥିଲେ । ସେପଟେ, ପୋଲିସ ସମସ୍ତ ଦିଗକୁ ଦେଖି ଘଟଣାର ତଦନ୍ତ ଆରମ୍ଭ କରିଛି । ନିର୍ଯ୍ୟାତନାରୁ ମହିଳା ଆତ୍ମହତ୍ୟା କରିଥିଲା ନା ତାଙ୍କର ହତ୍ୟାକାଣ୍ଡ କରାଯାଇ ସେନେଇ ଯାଞ୍ଚ କରୁଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
