ରାୟଗଡା: କୋରୋନା ମୁକାବିଲା ପାଇଁ ସାରା ଓଡିଶା ଲକଡାଉନ ଘୋଷଣା ପରେ ଗ୍ରୋସରୀ ଓ ବ୍ୟାଙ୍କରେ ଜନ ଗହଳି ଦେଖିବାକୁ ମିଳିଛି । ସେପଟେ ଲକଡାଉନ ପୂର୍ବରୁ ଗ୍ରାଉଣ୍ଡ ଜିରୋର ସ୍ଥିତି ଅନୁଧ୍ୟାନ କରିଛନ୍ତି ଜିଲ୍ଲାପାଳ ଓ ଏସପି । ସୂଚନା ଅନୁଯାୟୀ କୋରୋନା ମୁକାବିଲା ପାଇଁ ସାରା ଦେଶ ତତ୍ପର ଥିବା ବେଳେ ଓଡିଶାକୁ ସମ୍ପୂର୍ଣ ଭାବେ ଲକଡାଉନ ଘୋଷଣା କରିଛନ୍ତି ରାଜ୍ୟ ସରକାର।
ଏନେଇ ମଙ୍ଗଳବାର ରାୟଗଡା ଜିଲ୍ଲାକୁ ଲକଡାଉନ ଘୋଷଣା ପରେ ଗ୍ରୋସରୀ ଓ ବ୍ୟାଙ୍କରେ ଭିଡ ଦେଖିବାକୁ ମିଳିଛି। ତେବେ ସରକାର ଏଟିଏମରେ ଟଙ୍କା ଭର୍ତ୍ତି ରଖିବାକୁ ନିର୍ଦ୍ଦେଶ ଥିବା ବେଳେ ସହରର ବହୁ ଏଟିଏମ ଖରାପ ଓ ଲିଙ୍କ ଫେଲ ଥିବା ଦେଖିବାକୁ ମିଳିଛି । ତେବେ ବ୍ୟାଙ୍କ ପକ୍ଷରୁ ଲୋକଙ୍କୁ ସାନିଟାଇଜେସନ କରାଯାଉଥିବା ବେଳେ ଶୀଘ୍ର ଏଟିଏମ ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଏସବିଆଇର ଚିଫ ବ୍ୟାଙ୍କ ମ୍ୟାନେଜର ।
ମଙ୍ଗଳବାର ମଧ୍ୟ ରାତ୍ରିରୁ ସାରା ରାଜ୍ୟରେ ଲକଡାଉନ ହେବାକୁ ଥିବା ବେଳେ ରାୟଗଡ ଜିଲ୍ଲା ପ୍ରଶାସନ ପକ୍ଷରୁ ଆରମ୍ଭ ହୋଇଯାଇଛି ପ୍ରସ୍ତୁତି। ଏନେଇ ସନ୍ଧ୍ୟାରେ ଜିଲ୍ଲାପାଳ ପ୍ରମୋଦ କୁମାର ବେହେରା ଓ ଏସପି ଶ୍ରବଣ ବିବେକ ଏମ୍ ସହରର ବସ ଷ୍ଟାଣ୍ଡ ଏବଂ ବଜାରରେ ବୁଲି ଗ୍ରାଉଣ୍ଡ ଜିରୋର ସ୍ଥିତି ଅନୁଧ୍ୟାନ କରିଥିଲେ ।
ତେବେ ସରକାରୀ ଗାଇଡଲାଇନ ଅନୁଯାୟୀ ଔଷଧ, ଗ୍ରୋସରୀ ଓ କ୍ଷୀର ଦୋକାନ ଭଳି ଅତ୍ୟାବଶ୍ୟକୀୟ ସାମଗ୍ରୀ ଦୋକାନ ଗୁଡିକ ଖୋଲିବା ପାଇଁ ନିର୍ଦ୍ଦେଶ ରହିଥିବା ବେଳେ ଅନ୍ୟ ଦୋକାନ ଗୁଡିକ ବନ୍ଦ ରହିବ । ତେବେ ଜିଲ୍ଲା ସ୍ତରୀୟ ଅଧିକାରୀଙ୍କ ସହ ବିଚାର ବିମର୍ଶ ପରେ ଜିଲ୍ଲାପାଳ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ କୌଣସି ଜରୁରୀ କାମ ନଥିବା ବେଳେ ବାହାରକୁ ନ ବାହାରି ଘରେ ରହିବେ ।
ବୁଧବାର ସକାଳ 7ଟାରୁ ସନ୍ଧ୍ୟା 7ଟା ମଧ୍ୟରେ ପରିବା ଏବଂ ଗ୍ରୋସରୀ ଦୋକାନ ଖୋଲା ରହିବ । ଏହି ସମୟରେ ଯଦି କେହି କଳା ବଜାରୀ କରନ୍ତି ତାଙ୍କ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛିନ୍ତି ଜିଲ୍ଲାପାଳ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
