ରାୟଗଡା : ରାୟଗଡା ପୌର ପରିଷଦ ଅନ୍ତର୍ଗତ 1 ନଂ ଓ୍ବାର୍ଡରେ ଜବରଦଖଲ ଉଚ୍ଛେଦ କରିଛି ପ୍ରଶାସନ । ଜେସିବି ମେସିନ ସାହାର୍ଯ୍ୟରେ ପ୍ରାୟ 15 ଘରକୁ ଭଙ୍ଗାଯାଇଛି । ଫଲରେ ଏବେ ବାସହରା ହୋଇ ପଡିଛନ୍ତି ଶତାଧିକ ଲୋକ । କିଏ ଗହଣା ବନ୍ଧା ପକାଇ ତ ଆଉ କିଏ ମୁଲ ଲାଗି ତିଆରି କରିଥିଲେ ଘର । ପରେ କିନ୍ତୁ ଏହା ସରକାରୀ ଜମି ବୋଲି କହି ସେଠାରୁ ଜବରଦଖଲ ଖାଲି କରିବାକୁ ନୋଟିସ ଜାରି କରିଥିଲା ପ୍ରଶାସନ ।
ତେବେ ଥଇଥାନ ନକରି ଉଚ୍ଛେଦ ଆରମ୍ଭ କରିଥିଲା ପ୍ରଶାସନ । ଫଳରେ ଶହ ଶହ ଲୋକ ଏବେ ବାସହରା ହୋଇ ଖୋଲା ଆକାଶ ତଳେ । 20 ବର୍ଷ ଧରି ଏଠାରେ ବସବାସ କରୁଥିବା ଲୋକ ଅଚାନକ ବାସହରା ହୋଇଯଇଥିବା ବେଳେ ପ୍ରଶାସନ ସେମାନଙ୍କ ପାଇଁ କୌଣସି ଥଇଥାନ ବ୍ୟବସ୍ଥା କରିନାହିଁ । ଯାହା ଫଳରେ ଲୋକେ ପ୍ରଶାସନ ଉପରେ ଆସ୍ତା ହରାଇଛନ୍ତି ।
ଅନ୍ୟପକ୍ଷେ ସରକାରୀ ଜମି ଜବରଦଖଲରେ ଥିବା ଯୋଗୁଁ ଉଚ୍ଛେଦ କରାଗଲା ଓ ଆଗାମୀ ଦିନରେ ସେମାନଙ୍କ ପଇଁ ସରକାରୀ ପ୍ରକ୍ରିୟା ମାଧ୍ୟମରେ ଥଇଥାନ କରାଯିବ ବୋଲି କହିଛନ୍ତି ଅତିରିକ୍ତ ତହସଲଦାର । ଥଇଥାନ ପରେ ଉଚ୍ଛେଦ ଆରମ୍ଭ କରିବା ନେଇ ସର୍ବୋଚ୍ଚ ନ୍ୟାୟାଳୟଙ୍କ ଗାଇଡଲାଇନ ଥିବା ସତ୍ତ୍ବେ ତାହାର ବ୍ୟତିକ୍ରମ ଦେଖିବାକୁ ମିଳିଛି ରାୟଗଡା ଜିଲ୍ଲାରେ ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
