ରାୟଗଡା: ଜିଲ୍ଲା ପରିଷଦ ଅଧ୍ୟକ୍ଷ ଡ଼ଃ ପୁରୁଷୋତ୍ତମ ଗମାଙ୍ଗଙ୍କ ସଡକ ଦୁର୍ଘଟଣାରେ ମୃତ୍ୟୁ ହୋଇନାହିଁ ବରଂ ତାଙ୍କୁ ଷଡଯନ୍ତ୍ର କରି ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ସଙ୍ଗୀନ ଅଭିଯୋଗ କରିଛି କଂଗ୍ରେସ । ଯାହାର ପ୍ରତିବାଦ କରି ସୋମବାର ରାସ୍ତା ଅବରୋଧ କରିବା ସହ ସପ୍ତାହେ ମଧ୍ୟରେ ଘଟଣାର ଉଚ୍ଚସ୍ତରୀୟ ତଦନ୍ତ କରି ଅଭିଯୁକ୍ତକୁ ଖୋଜିବା ନେଇ ଦାବି କରିଛି କଂଗ୍ରେସ ।
ସୂଚନା ଅନୁଯାୟୀ ଗତ ଡିସେମ୍ବର 24 ତାରିଖ ରାତିରେ ଏକ ସଡକ ଦୁର୍ଘଟଣାରେ ଡ଼ଃ ଗମାଙ୍ଗଙ୍କ ମୃତ୍ୟୁ ହୋଇଥିବା ଖବର ସମଗ୍ର ଅଞ୍ଚଳ ବାସୀଙ୍କୁ ସ୍ତବ୍ଧ କରିଦେଇଥିଲା । ହେଲେ ଏହା ଦୁର୍ଘଟଣାଜନିତ ନୁହେଁ ବରଂ ହତ୍ୟାକାଣ୍ଡ ବୋଲି କଂଗ୍ରେସ ପକ୍ଷରୁ ଅଭିଯୋଗ ହୋଇଥିଲା । ଗୁଣୁପୁରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଜୟପୁର ବିଧାୟକ ତାରାପ୍ରସାଦ ବାହିନୀପତି ଏହି ଅଭିଯୋଗ କରିଥିଲେ ।
ତେବେ ସପ୍ତାହେ ମଧ୍ୟରେ ପୋଲିସ ଅଭିଯୁକ୍ତକୁ ଖୋଜୁ ନଚେତ ଏସଆଇଟି କିମ୍ବା ସିବିଆଇ ତଦନ୍ତ ଦାବି କରିଛି କଂଗ୍ରେସ । ପରେ ଡ଼ଃ ଗମାଙ୍ଗଙ୍କ ଶାଳକ ଏନେଇ ଗୁଣୁପୁର ଥାନାରେ ଅଭିଯୋଗ କରିଥିଲେ । ତେବେ ଜାଣିଶୁଣି ପୋଲିସ ଏତଲା ଗ୍ରହଣ କରିବାରେ ବିଳମ୍ବ ଓ ତଦନ୍ତରେ ଶୀଥିଳତା ପ୍ରକାଶ କରୁଥିବା ଅଭିଯୋଗ ହୋଇଛି । ତେଣେ ରାଜ୍ୟ ସରକାର ସବୁବେଳେ ଆଦିବାସୀ ବିରୋଧୀ ଓ ହତ୍ୟାକାରୀ ବୋଲି ବାହିନୀପତି ଆରୋପ କରିଛନ୍ତି ।
ସେହିଭଳି କୋରାପୁଟ ସାଂସଦ ମଧ୍ୟ ଏ ତଦନ୍ତରେ ସନ୍ତୁଷ୍ଟ ନହୋଇ ସିବିଆଇ ତଦନ୍ତ ଦାବି କରିବା ସହ ଦିଲ୍ଲୀ ସଂସଦରେ ଏ ପ୍ରସଙ୍ଗ ଉଠାଇବା କଥା ପ୍ରକାଶ କରିଛନ୍ତି । ସେପଟେ ପୁରୁଷୋତ୍ତମ ଗମାଙ୍ଗଙ୍କ ମା’ ମଧ୍ୟ ତାଙ୍କ ପୁଅକୁ ହତ୍ୟା କରାଯାଇଥିବା ଅଭିଯୋଗ କରି ଜିଲ୍ଲା ଆରକ୍ଷୀ ଅଧୀକ୍ଷକଙ୍କ ମନ୍ତବ୍ୟକୁ କଡା ଭାଷାରେ ନିନ୍ଦା କରିଛନ୍ତି । ଏନେଇ ସୋମବାର ଗୁଣୁପୁର ବାଙ୍ଗି ଛକଠାରେ ଦଳ ପକ୍ଷରୁ ରାସ୍ତାରୋକ କରାଯାଇଛି ।
ଏହି ରାସ୍ତାରୋକ ଦ୍ବାରା 3 ପଟରୁ ଯାନବାହନ ଚଳାଚଳ ବନ୍ଦ ରହିଥିଲା । ଏଥିରେ ଜିଲ୍ଲା କଂଗ୍ରେସ ସଭାପତି ଓ ଗୁଣୁପୁର, ରମାନଗୁଡା କଂଗ୍ରେସର ବହୁ କର୍ମୀ ତଥା ନେତା ସାମିଲ ହୋଇ ପ୍ରତିବାଦ କରିଛନ୍ତି । ତେବେ ଏହି ଆନ୍ଦୋଳନ ଆଗକୁ ଆହୁରି ଜୋରଦାର କରାଯିବ ବୋଲି ଦଳ ପକ୍ଷରୁ କୁହାଯାଇଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
