ରାୟଗଡ଼ା : ରାୟଗଡ଼ା ଜିଲ୍ଲା ସୁଳିପଦର ଗାଁରେ ମାଆ ମାଣିକେଶ୍ଵରୀଙ୍କ ନିଆରା ଦଶହରା ପର୍ବ ଅନୁଷ୍ଠିତ ହୋଇଯାଇଛି । ଏହି ଅବସରରେ ମାଣିକେଶ୍ଵରୀ ମନ୍ଦିର ପ୍ରାଙ୍ଗଣରେ ସ୍ଵତନ୍ତ୍ର ବିଧାନରେ ପୂଜାର୍ଚ୍ଚନା ସହ ଝାମୁଯାତ୍ରା ହୋଇଥିଲା । ଜୟପୁର ରାଜା ବିକ୍ରମ ଦେବ ସିଂହଙ୍କ ରାଜୁତି ସମୟରେ କଲ୍ୟାଣସିଂହପୁର ଠାରେ ରାଜା କଲ୍ୟାଣ ଦେବଙ୍କ ରାଜୁତି ଚାଲିଥିବା ସମୟରେ ମା’ଙ୍କର ଆର୍ବିଭାବ ହୋଇଥିଲା।
ସେହି ଦିନ ଠାରୁ ସୁଳିପଦର ଗାଁରେ ମାଆଙ୍କର ମନ୍ଦିର ସ୍ଥାପନ କରି ପୂଜାର୍ଚ୍ଚନା ହୋଇଆସୁଛି । ତେଣୁ ପ୍ରତିବର୍ଷ ଭଳି ଚଳିତ ଭାଦ୍ରବ ମାସ ଦ୍ଵାଦଶ ତିଥି ନବାନ୍ନସହ ବିଜୟା ଦଶମୀରେ ମନ୍ଦିର ପ୍ରାଙ୍ଗଣରେ ଝାମୁ ଯାତ୍ରା ବା ଅଗ୍ନି ଯାତ୍ରା ଅନୁଷ୍ଠିତ ହୋଇଥିଲା। ବିଜୟା ଦଶମୀରେ ମାଁ ମାଣିକେଶ୍ୱରୀ ଓ ଭୈରବ ଦେବଙ୍କ ପୂଜକ ନିକଟସ୍ଥ ଏକ ଝରଣାରୁ ବାଲି ସଂଗ୍ରହ କରିଥାନ୍ତି ।
ପରେ ସେହି ବାଲିରେ ମକା, ମାଣ୍ଡିଆ, ଧାନ, କାନ୍ଦୁଲ ଆଦି ଶଷ୍ୟ ଗଜା ପାଇଁ ପୋତାଯାଇ ଭୈରବ ଦେବଙ୍କ ପୀଠରେ ରଖାଯାଇଥାଏ । ଏହି ଯାତ୍ରା ଦେଖିବାକୁ କଲ୍ୟାଣସିଂହପୁର ବ୍ଲକ ସମେତ କଳାହାଣ୍ଡି କୋରାପୁଟ ଏପରିକି ଆନ୍ଧ୍ରପ୍ରଦେଶରୁ ଶ୍ରଦ୍ଧାଳୁଙ୍କ ଭିଡ ଜମିଥିଲା ।
ବିଷ୍ଣୁ ପ୍ରାସ୍କା ମୁଖ୍ୟ ପୂଜକଙ୍କ ତତ୍ତ୍ଵାବଧାନରେ ଏବଂ ଗାଁ ଲୋକଙ୍କ ମିଳିତ ସହଯୋଗରେ ପାଳନ ହୋଇଥିଲା ମାଣିକେଶ୍ଵରୀଙ୍କ ନିଆରା ଦଶହରା । ହଜାରହଜାର ଭକ୍ତଙ୍କ ଗହଣରେ ପାରମ୍ପାରିକ ବାଦ୍ୟରେ ଝୁମିଥିଲା ମାଣିକେଶ୍ଵରୀଙ୍କ ଦଶହରା ପର୍ବ । ଏଥିରେ ପୂଜକଙ୍କ ଦ୍ଵାରା ନିଆଁରେ ଚାଲିବା ସହିତ କଣ୍ଟା ଦୋଳିରେ ଝୁଲିବା ଦେବୀଙ୍କ ମହିମାକୁ ସ୍ପଷ୍ଟ ପ୍ରମାଣିତ କରୁଛି ।
ଇଟିଭି ଭାରତ, ରାୟଗଡ଼ା
