ରାୟଗଡ଼ା: ଦୀର୍ଘ ଦିନର ନୀରବତା ପରେ ଏବେ ପୁଣି ମୁଣ୍ଡ ଟେକିଲେଣି ନକଲି ମାଓବାଦୀ । ନକଲି ମାଓ ଚିଠି ସହ ଦେଉଥିଲେ ହତ୍ୟା ଧମକ । ତେବେ ଏଭଳି ଅଭିଯୋଗରେ ୪ ଜଣ ନକଲି ମାଓବାଦୀଙ୍କୁ ଗିରଫ କରିବାରେ ସଫଳ ହୋଇଛି ରାୟଗଡ଼ା ଜିଲ୍ଲା ଡୋରାଗୁଡା ପୋଲିସ । ଏନେଇ ସୂଚନା ଦେଇଛନ୍ତି ଏସପି ବିବେକାନନ୍ଦ ଶର୍ମା । ନକଲି ମାଓ ଚିଠି ଓ ହତ୍ୟା ଧମକ ହେଇ ଗିରଫ ୪ ଜଣଙ୍କ ମଧ୍ୟରେ ୨ ଜଣ ମହିଳା ରହିଥିବା ବେଳେ ବାକି ଦୁଇ ଜଣ ପୁରୁଷ ରହିଥିବା ପୋଲିସ ପକ୍ଷରୁ ସୂଚନା ମିଳିଛି ।
ମିଳିଥିବା ସୂଚନା ଅନୁସାରେ, କାଶୀପୁର ବ୍ଲକ ଦୋରାଗୁଡ଼ା ଥାନା ଅନ୍ତର୍ଗତ ଡିମୁଣ୍ଡି ଗ୍ରାମର ପରମାନନ୍ଦ ନାଏକ ଦେଇଥିବା ଲିଖିତ ଅଭିଯୋଗ ଅନୁସାରେ, ପରମାନନ୍ଦଙ୍କୁ ଏକ ମାଓ ଚିଠି ଆସିଥିଲା । ଉକ୍ତ ଚିଠିରେ ତାଙ୍କୁ ୬୦ ଲକ୍ଷ ଟଙ୍କା ଦେବାକୁ ଲିଖିତ ରହିଥିଲା । ଏଥି ସହିତ ଅଜଣା ନମ୍ବରରୁ ତାଙ୍କୁ ଫୋନ୍ କଲ୍ କରି ୬୦ ଲକ୍ଷ ଟଙ୍କା ଦେବା ପାଇଁ କୁହାଯାଇଥିଲା । ଟଙ୍କ ନଦେଲେ ଜୀବନରେ ମାରିଦେବାକୁ ଧମକ ମଧ୍ୟ ମିଳିଥିଲା । ତେବେ ଏନେଇ ସେ ଦୋରାଗୁଡ଼ା ଥାନାରେ ଲିଖିତ ଅଭିଯୋଗ କରିଥିଲେ । ଉକ୍ତ ଅଭିଯୋଗକୁ ଆଧାର କରି ପୋଲିସ ତଦନ୍ତ ଆରମ୍ଭ କରିଥିଲା । ତଦନ୍ତରୁ ପୋଲିସ ୪ ଜଣଙ୍କ ସମ୍ପୃକ୍ତି ରହିଥିବା ଜାଣି ସେମାନଙ୍କୁ ଠାବ କରିଥିଲେ । ତେବେ ଗିରଫ ୪ ଜଣ ହେଲେ କଳହାଣ୍ଡି ଜିଲ୍ଲା କଲମପୁର ଥାନା ମଣ୍ଡଳ ଗ୍ରାମର ଯଶୋବନ୍ତ ନାଏକ (୨୭) ଓ ବର୍ଷା ନାଏକ (୨୫), କାଶୀପୁର ଥାନା ମାଳିଗାଁର ପିଣ୍ଟ ଓରଫ୍ ରମେଶ ନାଏକ (୩୨) ଏବଂ ଝାରସୁଗୁଡ଼ା ଜିଲ୍ଲା ବ୍ରଜରାଜନଗର ଥାନା ବୁନ୍ଦିଆ କୋଲୋନୀ ଅନ୍ତର୍ଗତ କଲ୍ୟାଣୀ ପଂଚଭୟା (୩୦) ।
