ରାୟଗଡା: ଜିଲ୍ଲାରେ ବାଟ ହୁଡିଛି ସ୍ବାସ୍ଥ୍ୟ ସେବା । 7 ମାସରେ ଆଖି ବୁଜିଲେଣି 15 ଗର୍ଭବତୀ ସହ ବର୍ଷେ ମଧ୍ୟରେ 407 ଏବଂ 1 ରୁ 5 ବର୍ଷ ଭିତରେ 59 ଶିଶୁଙ୍କ ସମେତ ମୋଟ 466 ଶିଶୁ । ମାସକ ଭିତରେ ସ୍ଥିତି ନସୁଧୁରିଲେ କାର୍ଯ୍ୟାନୁଷ୍ଠାନ ହେବ ବୋଲି ଜିଲ୍ଲାପାଳଙ୍କ ସୂଚନା ।
ଜିଲ୍ଲାର ଚନ୍ଦ୍ରପୁର ବ୍ଲକର ବେଲମଗୁଡା, ବିଜାପୁର-୩, ବୁଡୁବାଲି, ମରିଚଗୁଡା, ଗୁଡାରି ବ୍ଲକର ଡାହାଣି, ମଧୁବନ, ଗୁଣପୁର ବ୍ଲକର ଭୀମପୁର-୧, ଗୋଠଲପଦର, କୁଲୁସିଂ, କାଶୀପୁର ବ୍ଲକର ବର୍ତିବାଲି, କାହ୍ନୁଗୁଡା, ପାଞ୍ଚାଳି, ଶଙ୍କରଡା-୧, ସୁରୁଗୁଞ୍ଜ, ମୁନିଗୁଡା ବ୍ଲକର ଇଚ୍ଛାପୁର-୪, ଖଲିଆଗୁଡା, ଲକ୍ଷ୍ମୀପୁର-୨, ରଘୁବାରି, ପଦ୍ମପୁର ବ୍ଲକର ଗୁଲୁଗୁଡା, ରାୟଗଡା ବ୍ଲକର ଚେକା, ଦୁର୍ଗାପାଡ଼ୁ, ଗାଜିଗାଁ, ଗୁମ୍ମା, ତାଡମା ସବ ସେଣ୍ଟରରେ ୪୦ ପ୍ରତିଶତରୁ ଅଧିକ ଗର୍ଭବତୀ ମହିଳା ଘରେ ହିଁ ପ୍ରସବ କରୁଥିବା ରିପୋର୍ଟ ସ୍ପଷ୍ଟ କରୁଛି ଅପହଞ୍ଚ ଇଲାକାରେ ସ୍ବାସ୍ଥ୍ୟ ସେବା କେତେ ସଫଳ ।
ମାସକ ଭିତରେ ସ୍ଥିତି ସୁଧାରିବାକୁ ଜିଲ୍ଲାପାଳ ପ୍ରମୋଦ କୁମାର ବେହେରା ତାଗିଦ କରିବା ସହ 24 ଏଏନଏମ ଓ ହେଲ୍ଥ ସୁପରଭାଇଜରଙ୍କୁ ଜବାବ ତଲବ କରିଛନ୍ତି। ସ୍ଥିତିରେ ସୁଧାର ନ ଆସିଲେ ଦୃଢ଼ କାର୍ଯ୍ୟାନୁଷ୍ଠାନ ସହ ଏଏନଏମ, ହେଲଥ୍ ସୁପରଭାଇଜରଙ୍କୁ ନିଲମ୍ବନ କରିବା ପାଇଁ ମଧ୍ୟ ଚେତାବନୀ ଶୁଣାଇଛନ୍ତି ଜିଲ୍ଲାପାଳ।
ରାୟଗଡ଼ାରୁ ରଞ୍ଜନ ରଥ, ଇଟିଭି ଭାରତ
