ରାୟଗଡା: ପୃଥକ ପୃଥକ ସ୍ଥାନରେ ରାସ୍ତା ଦୁର୍ଘଟଣା । ଭାରସାମ୍ୟ ହରାଇ ବାଇକ ଦୁର୍ଘଟଣାରେ ପ୍ରାଣ ହରାଇଲେ ଦୁଇ ଜଣ । ଏଥିସହ ଜଣେ ଶିଶୁ ସହିତ ୨ ଜଣ ଅଛନ୍ତି ଗୁରୁତର । ରାୟଗଡ଼ାର ଘଟଣା ।
ଦୁର୍ଘଟଣାରେ ଘଟଣାସ୍ଥଳରେ ଜଣେ ମୃତ ସହ ଶିଶୁ ଏବଂ ଦୁଇ ଗୁରୁତର ଅଛନ୍ତି । ରାୟଗଡ଼ା ଜିଲ୍ଲା କଲ୍ୟାଣସିଂହପୁର ଥାନା ଅନ୍ତର୍ଗତ ଭେଜା ନିକଟରେ ବାଇକ୍ ଦୁର୍ଘଟଣାଗ୍ରସ୍ତ ହୋଇଛି । ବାଇକରେ ଜଣେ ଶିଶୁ ସହିତ ୩ ଜଣ ରାୟଗଡ଼ାରୁ ସାର କିଣି ଚିଚିମି ଗାଁକୁ ଫେରୁଥିଲେ । ହେଲେ ରାସ୍ତାରେ ବାଇକ ଦୁର୍ଘଟଣା ପରେ ଘଟଣାସ୍ଥଳରେ ଚାଳକ ମଣି କାଡ୍ରାକାଙ୍କ ମୃତ୍ୟୁ ହେଇଛି । ଅନ୍ୟ ଦୁଇ ଗୋବିନ୍ଦ ପ୍ରସ୍କା ଓ ଶିଶୁ ଶିବ ହିକକା ଗୁରୁତର ଆହତ ହୋଇଛନ୍ତି ।
ଖବର ପାଇ ନିକଟସ୍ଥ ଭେଯା ଗାଁର ଲୋକେ ତୁରନ୍ତ ଘଟଣାସ୍ଥଳରେ ପହଞ୍ଚି ଗୁରୁତରଙ୍କୁ ଉଦ୍ଧାର କରିଛନ୍ତି । ଘଟଣାର ଖବର ପାଇ କଲ୍ୟାଣସିଂହପୁର ପୋଲିସ ପହଞ୍ଚି ତଦନ୍ତ କରୁଛି । ଏହି ଦୁର୍ଘଟଣା ସମ୍ପର୍କରେ କାହାର ପ୍ରତିକ୍ରିୟା ମିଳିପାରିନାହିଁ ।
ସେହିଭଳି ସୋମବାର ସନ୍ଧ୍ୟାରେ ଭାରସିଂ ଗ୍ରାମ ମୁଖ୍ୟରାସ୍ତରେ ଏକ ଗଛକୁ ପିଟି ପ୍ରାଣ ହରାଇଛନ୍ତି ବାଇକ ଚାଳକ । ମୃତକ ଜଣଙ୍କ ରାମନାଗୁଡା ବ୍ଲକ ଟିକରପଡା ଗ୍ରାମର ଗୋବର୍ଦ୍ଦନ ମିଶାଲ । ସେ ଗୁଣପୁର ଅଭିମୁଖେ ବାଇକରେ ଆସୁଥିବା ବେଳେ ଦୁର୍ଘଟଣା ଘଟିଛି । ଖବର ପାଇ ଦମକଳବାହିନୀ ଘଟଣାସ୍ଥଳରେ ପହଞ୍ଚି ଗୋବର୍ଦ୍ଧନଙ୍କୁ ଉଦ୍ଧାର କରି ଗୁଣପୁର ଉପଖଣ୍ଡ ମେଡିକାଲରେ ଭର୍ତ୍ତି କରିଥିଲେ । ସେଠାରେ ଡାକ୍ତର ଚିକିତ୍ସା କରିବା ପରେ ଗୋବର୍ଦ୍ଦନଙ୍କ ମୃତ୍ୟୁ ଘୋଷଣା କରିଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
