ପୁରୀ: ପୁଣି ଭାଇରାଲ ଭିଡିଓକୁ ନେଇ ଚର୍ଚ୍ଚାରେ ପୁରୀ ପୋଲିସ । ହତ୍ୟା ଅଭିଯୁକ୍ତ ସହ ରାମଚଣ୍ଡି ମେରାଇନ ଥାନା ଅଧିକାରୀଙ୍କ ସେଲ୍ଫି ନେଇ ଚାରିଆଡ଼େ ସମାଲୋଚନା କରାଯାଇଥିବାବେଳେ ସୋସିଆଲ ମିଡିଆରେ ବୁଲୁଥିବା ଏକ ଭିଡିଓ ପୁରୀ ପୋଲିସ ସହିତ ଅଭିଯୁକ୍ତଙ୍କ ସମ୍ପର୍କକୁ ପଦାରେ ପକାଇଛି ।
ଭାଇରାଲ ହେଉଥିବା ଏହି ଭିଡିଓରେ ପୋଲିସ ଜିପ ପାର୍ଶ୍ବରେ ଚାଲିଛି ବେଧଡକ ଜୁଆ ଖେଳ । ପ୍ରାୟ 10ରୁ ଊର୍ଦ୍ଧ୍ବ ଯୁବକ ତାସ ଖେଳ ବୋଲି ଲଗାଉଛନ୍ତି । ନିକଟରେ ପୁଳାପୁଳା ଟଙ୍କା ବାଜି ଲାଗିଛି । ଆଉ ଜୁଆ ଆଡ୍ଡା ନିକଟରେ ପୋଲିସ ଜିପ ଥିବା ଭିଡିଓରେ ସ୍ପଷ୍ଟ ଦେଖାଯାଉଛି । ତଥାପି ଜୁଆଡ଼ିମାନେ ବେଫିକର ହୋଇ ଜୁଆ ଖେଳରେ ମାତିଥିବା ଦେଖାଯାଇଛି ।
ଏକ ଟ୍ବିଟ ଜରିଆରେ ଏହି ଘଟଣାକୁ ପୋଲିସ ଡିଜିଙ୍କ ସମେତ ପୁରୀ ଏସପିଙ୍କ ଦୃଷ୍ଟି ଆକର୍ଷଣ କରାଯାଇଛି । ଏହି ଦୃଶ୍ୟ ଚିଲିକାର ସାତପଡ଼ା ଅଞ୍ଚଳର ବୋଲି ଉକ୍ତ ବ୍ୟକ୍ତି ଟ୍ବିଟରେ ଦର୍ଶାଇଛନ୍ତି । ଆଲୋକ କୁମାର ଦାସ ନାମକ ଜଣେ ଯୁବକ ଏହି ଟ୍ବିଟ କରିଛନ୍ତି । ଏହି ଭିଡିଓକୁ ଦେଖି ବ୍ରହ୍ମଗିରି ପୋଲିସର କର୍ତ୍ତବ୍ୟ ନିଷ୍ଠା ଉପରେ ପ୍ରଶ୍ନ ଉଠିବା ପରେ ଅଭିଯୋଗ ପାଇ ପୁରୀ ଏସପି ଉମାସଙ୍କର ଦାସ ଏହାର ତଦନ୍ତ ଆରମ୍ଭ କରିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
