ପୁରୀ: ଆଜି ପବିତ୍ର ଶ୍ରୀ ପଞ୍ଚମୀ ତିଥି ଅବସରରେ ବିଶ୍ବପ୍ରସିଦ୍ଧ ଘୋଷଯାତ୍ରା ରଥ କାଠର ଅନୁକୂଳ ହୋଇଛି । ଶ୍ରୀମନ୍ଦିର କାର୍ଯ୍ୟଳୟ ସମ୍ମୁଖ ରଥ ଖଳାରେ ଏହି ପୂଜା ଆଜି ସନ୍ଧ୍ୟାରେ ଅନୁଷ୍ଠିତ ହୋଇଛି । ନୟାଗଡ ବନଖଣ୍ଡରୁ ଆସିଥିବା କାଠ ମଧ୍ୟରୁ ତିନିଖଣ୍ଡ 12 ଫୁଟିଆ ଧଉରା କାଠକୁ ପୂଜାର୍ଚ୍ଚନା କରାଯାଇଛି । ରାଜ୍ୟ ପୁରୋହିତଙ୍କ ପାରମ୍ପିରକ ପୂଜାପଦ୍ଧିତିରେ ରଥ କାଠର ଅନୁକୂଳ ହୋଇଛି ।
ପରମ୍ପରା ଅନୁସାରେ ରାଜପୁରୋହିତ ଓ ବ୍ରାହ୍ମଣଙ୍କ ଦ୍ବାରା ସ୍ବତନ୍ତ୍ର ପୂଜା ମା ସରସ୍ବତୀଙ୍କ ନିକଟରେ କରାଯିବା ପରେ ରଥଖଳାରେ ତିନିଖଣ୍ଡ ଧଉରା କାଠକୁ ରାଜଗୁରୁ ଓ ବ୍ରାହ୍ମଣମାନେ ବନ୍ଦାପନା ସହିତ ପୂଜା କରିଥିଲେ ।
ପ୍ରଥମ ପର୍ଯ୍ୟାୟ ରଥକାଠ ନୟାଗଡ ବନଖଣ୍ଡରୁ ଚଳିତ ମାସ 4 ତାରିଖରେ ପୁରୀରେ 2 ଟ୍ରକ ରଥକାଠ ପହଞ୍ଚିଥିଲା । ସମୁଦାୟ 57 ଖଣ୍ଡ କାଠ ଆସିଛି । 2ଟି ଟ୍ରକରେ 20 ଫୁଟିଆ ଧଉରା 4ଟି ,12 ଫୁଟିଆ ଧଉରା 22ଟି ,20 ଫୁଟିଆ ଅସନ 11ଟି ଓ 12 ଫୁଟିଆ ଅସନ 20 ଟି । ଚଳିତବର୍ଷ ରଥଯାତ୍ରା ପାଇଁ 670 ଖଣ୍ଡ ରଥକାଠ ଆବଶ୍ୟକ ।
ସେପଟେ ଆଉ ଗୋଟିଏ ଟ୍ରିପ ରଥକାଠ କଟକ ଖପୁରିଆ କରତକଳକୁ ଚିରଟ ପାଇଁ ପଠା ଯାଇଛି । ତେବେ ଆସନ୍ତା ଶ୍ରୀରାମ ନବମୀ ଦିନ ଚିରଟ କରାଯିବ । ଶ୍ରୀପଞ୍ଚମୀ ବା ସରସ୍ବତୀ ପୂଜା ଦିନ ରଥ ଖଳାରେ ତିନିଟି କାଠକୁ ପୂଜାର୍ଚ୍ଚନା କରାଯିବାର ବିଧି ରହିଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
