ପୁରୀ: ରବିବାର ସାରା ଭାରତବର୍ଷରେ ପାଳନ ହେବାକୁ ଯାଉଛି ଜନତା କର୍ଫ୍ୟୁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ବାନରେ ସାରା ଦେଶବାସୀ ଏହି ଜନତା କର୍ଫ୍ୟୁ ପାଳନ କରିବେ । ମାହାମାରୀରେ ପରିଣତ ହୋଇଥିବା କୋରୋନାକୁ ନେଇ ସତର୍କତା ଓ ସଚେତନତା ପାଇଁ ଏହି କାର୍ଯ୍ୟକ୍ରମ ଅନୁଷ୍ଠିତ ହେଉଛି। ଏହି କାର୍ଯ୍ୟକ୍ରମକୁ ନାଗରିକମାନେ ସମର୍ଥନ ଜଣାଇଥିବା ବେଳେ ଅନ୍ତର୍ଜାତୀୟ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ମଧ୍ୟ ନିଜ ବାଲୁକା କଳା ମାଧ୍ୟମରେ ଦେଇଛନ୍ତି ସଚେତନତା ବାର୍ତ୍ତା ।
ଜନତା କର୍ଫ୍ୟୁ ଭଳି ନିଆରା କାର୍ଯ୍ୟକ୍ରମକୁ ଅନ୍ତର୍ଜାତୀୟ ବାଲୁକା ଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ସମର୍ଥନ କରିଛନ୍ତି । ପୁରୀ ବେଳାଭୂମିରେ ଏନେଇ ଏକ ସୁନ୍ଦର ବାଲୁକା କଳା ନିର୍ମାଣ କରି ଏହାକୁ ସମର୍ଥନ ଦେଇଛନ୍ତି। ସାରା ଦେଶବାସୀ ଜନତା କର୍ଫ୍ୟୁକୁ ମାନି ରବିବାର ସକାଳୁ ସନ୍ଧ୍ୟା ଯାଏଁ ଘରେ ରହିବାକୁ ସୁଦର୍ଶନ ଲୋକଙ୍କୁ ବାର୍ତ୍ତା ଦେଇଛନ୍ତି। ତେବେ କୋରୋନାକୁ ଦୃଷ୍ଟିରେ ରଖି ଲୋକେ ସଚେତନ ହେବା ସହ ଦରକାର ଥିଲେ କେବଳ ଘରୁ ବାହାରିବାକୁ ସଚେତନ କରିଛନ୍ତି ସୁଦର୍ଶନ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
