ପୁରୀ: ଆଜି (ବୁଧବାର) ପ୍ରଥମାଷ୍ଟମୀ । ସେଥିପାଇଁ ଶ୍ରୀମନ୍ଦିର ହୋଇଥିଲା ଚଳଚଞ୍ଚଳ । ବଡଭାଇ ତଥା ମହାପ୍ରଭୁ ବଳଭଦ୍ର ହୋଇଛନ୍ତି ପୋଢୁଆଁ । ଏପଟେ ଲୋକକଥା ମୁତାବକ ମହାପ୍ରଭୁ ଜଗନ୍ନାଥଙ୍କ ମାମୁ ଘର ଦାବି କରି ନିଆଳି ସ୍ଥିତ ମାଧବାନନ୍ଦ ମନ୍ଦିରରୁ ଆସିଥିଲା ଶ୍ରୀମନ୍ଦିରକୁ ପୋଢ଼ୁଆଁ ଭାର । ହେଲେ ଏହି ପୋଢୁଆଁ ଭାରକୁ ନେଇ ଏବେ ଦେଖାଦେଇଛି ବିବାଦ ।
ମହାପ୍ରଭୁଙ୍କ ପାଇଁ ପଢ଼ୁଆଁ ଭାର ଆଣିଥିବା ନିଆଳିର ମାଧବାନନ୍ଦ ମନ୍ଦିର ଟ୍ରଷ୍ଟର ସାମଗ୍ରୀ କୁ ଶ୍ରୀମନ୍ଦିର ପ୍ରଶାସନ ଗ୍ରହଣ କରିନାହିଁ । ଶ୍ରୀମନ୍ଦିର ସ୍ବତଲିପିରେ ନିଆଳିର ମାଧବାନନ୍ଦ ମନ୍ଦିର ଶ୍ରୀଜଗନ୍ନାଥଙ୍କ ମାମୁ ଘର ନେଇ କୌଣସି ତଥ୍ୟଗତ ପ୍ରମାଣ ନାହିଁ । ଏଣୁ ପଢ଼ୁଆଁ ପାଇଁ ଆସିଥିବା ସାମଗ୍ରୀ ଶ୍ରୀମନ୍ଦିର ପ୍ରଶାସନ ଗ୍ରହଣ କରିନାହିଁ। ଶ୍ରୀମନ୍ଦିର ନୀତି ପ୍ରଶାସକ ଏହି ସୂଚନା ଦେଇଛନ୍ତି । ତେବେ ମାଧବାନନ୍ଦ ଟ୍ରଷ୍ଟ ପକ୍ଷରୁ ମହାପ୍ରଭୁଙ୍କ ଉଦ୍ଦେଶ୍ୟରେ ଦିଆଯାଇ ଥିବା ଖଣ୍ଡୁଆ ପାଟ କୁ କେଵଳ ଶ୍ରୀମନ୍ଦିର ପ୍ରଶାସନ ଦାନ ହିସାବରେ ଗ୍ରହଣ କରିଛି । ଏହାସହ 3ହଜାର 5ଶହ ଟଙ୍କା ମଧ୍ୟ ଗ୍ରହଣ କରାଯାଇଛି ।
ଗତ 16 ତାରିଖରେ ନିଆଳିର ମାଧବାନନ୍ଦ ମନ୍ଦିର ଟ୍ରଷ୍ଟ ପକ୍ଷରୁ ଶ୍ରୀମନ୍ଦିର ପ୍ରଶାସନକୁ ମହାପ୍ରଭୁଙ୍କ ଉଦ୍ଦେଶ୍ୟରେ ଖଣ୍ଡୁଆ ପାଟ ଦେବା ନେଇ ଅନୁମତି ମଗାଯାଇ ଥିଲା । ଯାହାକୁ ଶ୍ରୀମନ୍ଦିର ପ୍ରଶାସନ ଗ୍ରହଣ କରିଛି। ତେବେ ପଢ଼ୁଆଁ ଭାର ଗ୍ରହଣ ହୋଇନଥିବା ଶ୍ରୀମନ୍ଦିର ନୀତି ପ୍ରଶାସକ କହିଛନ୍ତି ।
ସେପଟେ ଏହି ପ୍ରସଙ୍ଗକୁ ନେଇ ନିଆଳି ମାଧବାନନ୍ଦଜୀଉଙ୍କ ସେବକ କହିଛନ୍ତି ନିଆଳି ମାଧବାନନ୍ଦ ମହାପ୍ରଭୁଙ୍କ ମାମୁଘର ବୋଲି ପ୍ରାଚୀ ପୁରାଣ, ମଙ୍ଗଳା ପୁରାଣରେ ବର୍ଣ୍ଣିତ ରହିଛି । ତେବେ ଆଗାମୀ ଦିନରେ ଗବେଷକଙ୍କୁ ନେଇ ଶ୍ରୀମନ୍ଦିର ପ୍ରଶାସନକୁ ଉପଯୁକ୍ତ ତଥ୍ୟ ଦିଆଯିବ ବୋଲି ପ୍ରଭୁ ମାଧବାନନ୍ଦ ଜୀଉଙ୍କ ସେବକମାନେ କହିଛନ୍ତି । ସେବକ ଆହୁରି କହିଛନ୍ତି ଆସନ୍ତା ବର୍ଷ ମଧ୍ୟ ଚଳିତ ବର୍ଷ ଠାରୁ ଆହୁରି ବିଶାଳ ଅଧ୍ୟତ୍ମିକ ଶୋଭାଯାତ୍ରାରେ ଶ୍ରଦ୍ଧାଳୁ ମାନେ ଶ୍ରୀମନ୍ଦିର ଯାଇ ପରମ୍ପରାକୁ ଉଜ୍ଜୀବିତ ରଖିବା ପାଇଁ ଉଦ୍ୟମ କରିବେ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
