ବ୍ରହ୍ମଗିରି: ବ୍ରହ୍ମଗିରି ରେଞ୍ଜ ଅଧିନ ଘଟୁକୁଡି ଗ୍ରାମରୁ 20ଟି ମୃତ ବିଦେଶୀ ପକ୍ଷୀ ଜବତ । ଶୀତ ଋତୁ ଆରମ୍ଭରେ ଚିଲିକା ଏବଂ ଚିଲିକା ପାର୍ଶ୍ବବର୍ତ୍ତୀ ବାହ୍ୟ ଚିଲିକାରେ ବିଦେଶୀ ପକ୍ଷୀ ମାନଙ୍କର ସମାଗମ ବଢ଼ିବାରେ ଲାଗିଛି ।
ଚିଲିକାର ପାର୍ଶ୍ବବର୍ତ୍ତୀ ଗ୍ରାମ ପୋଖରୀ ଓ ବିଲ ଗୁଡିକରେ ଖାଦ୍ୟ ପାଇଁ ପକ୍ଷୀମାନେ ବହୁଳ ମାତ୍ରାରେ ଦେଖା ଦେବାରେ ଲାଗିଛନ୍ତି । ଏହାର ସୁଯୋଗ ନେଇ ବିଦେଶୀ ପକ୍ଷୀ ମାଂସ ଲୋଭୀ ଶିକାରୀ ମାନେ ବିଷ ଦେଇ ପକ୍ଷୀ ଶିକାରରେ ଲାଗି ପଡିଛନ୍ତି । ପ୍ରତିଦିନ ନିରୀହ ବିଦେଶୀ ପକ୍ଷୀ ଜୀବନ ହାରୁଥିବା ବେଳେ ବ୍ରହ୍ମଗିରି ରେଞ୍ଜ ପକ୍ଷରୁ ଶିକାରୀ ମାନଙ୍କୁ ଧରିବା ପାଇଁ ପେଟ୍ରୋଲିଂ ଜାରି ରହିଛି ।
ଏନେଇ ଆଜି ସକାଳୁ ବିଶେଷ ସୂତ୍ରରୁ ଖବର ପାଇ ବ୍ରହ୍ମଗିରି ରେଞ୍ଜ ଅଧିକାରୀ ଦନାର୍ଦନ ମିଶ୍ରଙ୍କ ସହିତ ଏକ ଟିମ ଘଟୁକୁଡି ଗ୍ରାମରେ ଚଢ଼ାଉ କରିଥିଲେ । ଏମାନଙ୍କୁ ଦେଖି ଶିକାରୀ ମାନେ ଖସି ଯାଇଥିବା ବେଳେ 20 ଟି ମୃତ ବିଦେଶୀ ପକ୍ଷୀ ଜବତ କରିଥିବା ରେଞ୍ଜ ଅଧିକାରୀ ସୂଚନା ଦେଇଛନ୍ତି ।
ଇଟିଭି ଭାରତ, ବ୍ରହ୍ମଗିରି
