ପୁରୀ: ଫନି ମାଡରେ ଧ୍ବସ୍ତବିଧ୍ବସ୍ତ ପୁରୀ ସହର ଯେ ସବୁ ପରିସ୍ଥିତିର ସାମ୍ନା କରିବାକୁ ପ୍ରସ୍ତୁତ ଏହି ବାର୍ତ୍ତା ବିଶ୍ବକୁ ଦେବା ପାଇଁ ଆରମ୍ଭ ହେବାକୁ ଯାଉଛି ବେଳାଭୂମି ସଫେଇ ସହ ‘ମୋ ବିଚ’ ଅଭିଯାନ।
ଆସନ୍ତାକାଲି ଆନ୍ତର୍ଜାତୀୟ ବେଳାଭୂମି ସଫେଇ ଦିବସ ଅବସରରେ ଏନେଇ ପୁରୀ ପ୍ରଶାସନ ଆୟୋଜନ କରୁଛି ଏକ ସ୍ବତନ୍ତ୍ର କାର୍ଯ୍ୟକ୍ରମ । କାର୍ଯ୍ୟକ୍ରମ ଅନୁସାରେ ଜିଲ୍ଲାର ପ୍ରାୟ ଶହେ କିଲୋମିଟର ବ୍ୟାପି ବେଳାଭୂମିରେ ଶହେଟି ସ୍ଥାନରେ ଏକାଠି ହେବେ ଦଶହଜାର ଲୋକ। ସକାଳ ୬ ଟାରୁ 7.30 ପର୍ଯ୍ୟନ୍ତ ବେଳାଭୂମିର ସଫେଇ କରାଯିବ ବୋଲି ସୂଚନା ଦେଇଛନ୍ତି ଜିଲ୍ଲାପାଳ ବଲୱନ୍ତ ସିଂ। ଏହାସହ ପୁରୀ ପୌରାଞ୍ଚଳର ଏକ କାଳୀନ ୧୭ଟି ସ୍ଥାନରେ ବେଳାଭୂମି ସଫେଇ କାର୍ଯ୍ୟକ୍ରମ ହେବା ସହ ଆଠଟା ବେଳେ ରାଜଭବନ ବେଳାଭୂମିରେ ସମସ୍ତେ ଏକାଠି ହେବେ।
ଅଂଶଗ୍ରହଣକାରୀ ପ୍ରଥମେ ବେଳାଭୂମିରେ ନିଜ ନାମ ଲେଖି ପରିବେଶ ସୁରକ୍ଷା ରଖିବାକୁ ଶପଥ ନେବେ। ଏହି କାର୍ଯ୍ୟକ୍ରମରେ ଛାତ୍ରଛାତ୍ରୀ, ଶିକ୍ଷକ, ଶିକ୍ଷୟତ୍ରୀ, ବିଭିନ୍ନ ସେଚ୍ଛାସେବୀ ଅନୁଷ୍ଠାନ, ସରକାରୀ କର୍ମଚାରୀ, ଆଇନଜୀବୀ, ଗଣମାଧ୍ୟମ ପ୍ରତିନିଧିଙ୍କ ସହ ସବୁବର୍ଗର ବ୍ୟକ୍ତି ବିଶେଷଙ୍କୁ ସାମିଲ ହେବା ପାଇଁ ଅନୁରୋଧ କରାଯାଇଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
