ପୁରୀ: ପବିତ୍ର ରାକ୍ଷୀ ପୂର୍ଣ୍ଣିମା ଓ ସ୍ବାଧୀନତା ଦିବସ ପାଇଁ ପୁରା ଦେଶ ହେଉଛି ସଜବାଜ । ଏହି ଅବସରରେ ବାଲୁକା କଳାରେ ଦେଶବାସୀଙ୍କୁ ଶୁଭେଚ୍ଛା ଜଣାଇଛନ୍ତି ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ଓ ମାନସ ସାହୁ ।
ବାଲୁକାଶିଳ୍ପୀ ସୁଦର୍ଶନ ପଟ୍ଟନାୟକ ଆକର୍ଷଣୀୟ ବାଲୁକା କଳା ମାଧ୍ୟମରେ ଉଭୟ ରାକ୍ଷୀ ପୂର୍ଣ୍ଣିମା ଓ ସ୍ବାଧୀନତା ଦିବସର ଶୁଭେଛା ଜଣାଇଛନ୍ତି । ବାଲୁକା କଳାରେ ରାକ୍ଷୀରେ ତ୍ରିରଙ୍ଗା ସମେତ ଭାରତ ମାନଚିତ୍ରର ପ୍ରତିକୃତି ସ୍ଥାନ ଦେଇଛନ୍ତି । ସମସ୍ତ ଭାରତୀୟ ଏକ ହୋଇ ଶାନ୍ତିରେ ସହାବସ୍ଥାନ କରିବା ନେଇ ସେ ଆହ୍ବାନ ଦେଇଛନ୍ତି । ସେହିପରି ଦେଶବାସୀ ମହିଳାଙ୍କ ସୁରକ୍ଷା ଦିଗରେ ଆଗେଇ ଆସିବାକୁ ରାକ୍ଷୀ ପୂର୍ଣ୍ଣିମା ଅବସରରେ ସେ ବାଲୁକା କଳା ମାଧ୍ୟମରେ ବାର୍ତ୍ତା ଦେଇଛନ୍ତି ।
ସେହିପରି ପୁରୀ ଲାଇଟ ହାଉସ ବେଳାଭୂମିରେ ବାଲୁକା ଶିଳ୍ପୀ ମାନସ ସାହୁ ନିଆରା ଢଙ୍ଗରେ ତ୍ରିରଙ୍ଗା ରାକ୍ଷୀ ତିଆରି ଦେଶବାସୀଙ୍କୁ ରାକ୍ଷୀ ପୂର୍ଣ୍ଣିମାର ଶୁଭେଚ୍ଛା ଜଣାଇଛନ୍ତି । 15 ଫୁଟ ଲମ୍ବର ଏହି ବାଲୁକା କଳା କରିବାକୁ ପ୍ରାୟ 5 ଘଣ୍ଟା ଲାଗିଥିବା ମାନସ ସାହୁ କହିଛନ୍ତି । ତେବେ ନିଜ ଉପରେ ବିଶ୍ବାସ ରଖି ସମସ୍ତେ ଏକ ହୋଇ ଦେଶକୁ ଉନ୍ନତି ପଥରେ ଆଗେଇ ନେବାକୁ ସେ ଏହି ବାଲୁକା କଳା ମାଧ୍ୟମରେ ଆହ୍ବାନ ଦେଇଥିବା କହିଛନ୍ତି ।
ପୁରୀ ରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
