ପୁରୀ: ଆମେରିକା ରାଷ୍ଟ୍ରପତି ନିର୍ବାଚନରେ କାହାର ହେବ ଜିତାପଟ ? କିଏ ହେବ ରାଷ୍ଟ୍ରପତି ? କାହା ମୁଣ୍ଡରେ ଆମେରିକାବାସୀ ସୁନାକଳସୀ ଢାଳିବେ, ସେନେଇ ସାରା ବିଶ୍ୱର ନଜର ରଖିଛି । ଜୋ ବିଡେନ ତାଙ୍କର ପ୍ରତୀପକ୍ଷ ପ୍ରାର୍ଥୀ ଟ୍ରମ୍ପଙ୍କ ଠାରୁ କେତେକ ସ୍ଥାନରେ ଆଗରେ ଅଛନ୍ତି ।
ସେପଟେ ଭୋଟରେ ଜାଲିଆତି ଅଭିଯୋଗ ଆଣି ଟ୍ରମ୍ପ ସୁପ୍ରିମକୋର୍ଟଙ୍କ ଦ୍ୱାରସ୍ଥ ମଧ୍ୟ ହୋଇଛନ୍ତି । ଏଭଳି ପରିସ୍ଥିତିରେ ନିର୍ବାଚନୀ ଫଳାଫଳକୁ ସମସ୍ତେ ଚାହିଁରହି ଥିବାବେଳେ କିଏ ଆମେରିକାର ରାଷ୍ଟ୍ରପତି ହେବେ ସେନେଇ ଚର୍ଚ୍ଚା ଜୋରଧରିଛି ।
ଏନେଇ ପୁରୀ ବେଳାଭୂମିରେ ଏକ ରୋମାଞ୍ଚକର ଦୃଶ୍ୟ ଦେଖିବାକୁ ମିଳିଛି । ଅନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟନାୟକ ଏକ ବାଲୁକା କଳା ପ୍ରଦର୍ଶନୀ କରିଛନ୍ତି । ଏହି କଳାରେ ଡୋନାଲ୍ଡ ଟ୍ରମ୍ପ ଓ ଜୋ ବିଡେନ ମୁହାଁମୁହିଁ ଥିବା ଦେଖିବାକୁ ମିଳୁଛି । ଏଥିସହ ଉଭୟଙ୍କ ଚିତ୍ର ନିକଟରେ ଆମେରିକା ଜାତୀୟପତାକା ଚିହ୍ନ ଥିବାବେଳେ ଉଭୟ ପ୍ରାର୍ଥୀଙ୍କ ମଝିରେ ପ୍ରଶ୍ନବାଚୀ ଚିହ୍ନ ଦୃଶ୍ୟମାନ ହେଉଛି । ଏହି ପ୍ରଶ୍ନବାଚୀ ଚିହ୍ନ ଏକପ୍ରକାର ଆମେରିକାର ଫଳାଫଳକୁ ସମସ୍ତେ ଚାହିଁ ରହିଥିବା ସୂଚାଉଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
