ପୁରୀ: ବନ୍ଦେ ଭାରତ ଏକ୍ସପ୍ରେସକୁ ସଫେଇ କରି କୀର୍ତ୍ତିମାନ । ମାତ୍ର 14 ମିନିଟରେ 16ଟି କୋଚକୁ କରାଗଲା ସଫେଇ । ପୂର୍ବରୁ ଟ୍ରେନ୍ ସଫେଇ ପାଇଁ 45 ମିନିଟ ସମୟ ଲାଗୁଥିବା ବେଳେ ଏବା ମାତ୍ର 14 ମିନିଟରେ ସଫା କାମ ଶେଷ କରାଯାଇଛି । ତେବେ ପୁରୀ ହାୱଡ଼ା ବନ୍ଦେ ଭାରତ ଏକ୍ସପ୍ରେସରେ ଏଇ ସଫେଇ କାର୍ଯ୍ୟ କରିଛି ପୂର୍ବତଟ ରେଳ ବିଭାଗ ।
ସାରା ଭାରତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ଵାନ କ୍ରମେ ସ୍ଵଚ୍ଛତା ହିଁ ସେବା ଅଭିଯାନ ଆରମ୍ଭ ହୋଇଛି । ଏହି ଅଭିଯାନକୁ ଜନସଚେତନତାରେ ପରିଣତ କରିବା ପାଇଁ ରେଳ ବିଭାଗ ମଧ୍ୟ ଆଗେଇ ଆସିଛି । ତେଣୁ ଆଜି ପୁରୀ ରେଳ ଷ୍ଟେସନରେ ପୁରୀ ହାୱଡ଼ା ବନ୍ଦେ ଭାରତ ଏକ୍ସପ୍ରେସକୁ ମାତ୍ର 14 ମିନିଟରେ ସଫା କରାଯାଇ ଏକ ନୂଆ କୀର୍ତ୍ତିମାନ କରିଛି ପୂର୍ବତଟ ରେଳବାଇ । ଏଥିପାଇଁ ପୁରୀ ଷ୍ଟେସନରେ ଏକ ସ୍ବତନ୍ତ୍ର କାର୍ଯକ୍ରମ ଆୟୋଜନ କରାଯାଇଥିଲା ।
ତେବେ ଏହି କାର୍ଯ୍ୟକ୍ରମରେ ଖୋର୍ଦ୍ଧା ଡିଆରଏମ ଅଜେଶ ବାଗଲା, ପୁରୀ ବିଧାୟକ ଜୟନ୍ତ ଷଡ଼ଙ୍ଗୀ ପ୍ରମୁଖ ଯୋଗ ଦେଇ ବନ୍ଦେ ଭାରତର ଏହି 14 ମିନିଟ୍ ସଫେଇ କାର୍ଯକ୍ରମକୁ ଆଗେଇ ନେଇଥିଲେ । ଖୋର୍ଦ୍ଧା ଡିଆରଏମ କହିଛନ୍ତି,"ପ୍ରଧାନମନ୍ତ୍ରୀଙ୍କ ଆହ୍ଵାନ କ୍ରମେ ଭାରତରେ ସ୍ୱଚ୍ଛତା ହିଁ ସେବା ଅଭିଯାନ ଜାରୀ ରହିଛି । ଏହି କାର୍ଯ୍ୟକ୍ରମକୁ ଜନ ଆନ୍ଦୋଳନରେ ପରିଣତ କରିବା ପାଇଁ ପୂର୍ବତଟ ରେଳୱେ ଏହି ସଫେଇ ଅଭିଯାନ ଆରମ୍ଭ କରିଛି । ପୁରୀ ହାୱଡ଼ା ବନ୍ଦେ ଭାରତ ଏକ୍ସପ୍ରେସର 16 ଟି ବଗିକୁ ମାତ୍ର 14 ମିନିଟରେ ସଫା କରାଯାଇଛି। ପୁର୍ବରୁ ଟ୍ରେନ୍ ସଫେଇ ପାଇଁ 45 ମିନିଟ ସମୟ ଲାଗୁଥିଲା । ଏବେ ଏହାକୁ ପରିବର୍ତ୍ତନ କରାଯାଇଛି । ଅଧିକ ସଫେଇ କର୍ମଚାରୀ, ଆଧୁନିକ ସଫେଇ ଯନ୍ତ୍ର ଯୋଗାଇ ଦିଆଯାଇଛି । ଆଗାମୀ ଦିନରେ ଅନ୍ୟ ଟ୍ରେନରେ ମଧ୍ୟ ଏହି ଭଳି ସଫେଇ ବ୍ୟବସ୍ଥା ଆରମ୍ଭ ହେବ।"
ଏହା ମଧ୍ୟ ପଢ଼ନ୍ତୁ...ଏକକାଳୀନ 9 ‘ବନ୍ଦେ ଭାରତ ଏକ୍ସପ୍ରେସ’ର ଶୁଭାରମ୍ଭ କଲେ ପ୍ରଧାନମନ୍ତ୍ରୀ
ସେପଟେ ପୁରୀ ବିଧାୟକ ଜୟନ୍ତୀ ଷଡ଼ଙ୍ଗୀ ସ୍ୱଚ୍ଛତା ହିଁ ସେବା କାର୍ଯକ୍ରମକୁ ଉଚ୍ଚ ପ୍ରଶଂସା କରିଛନ୍ତି । ପରିବେଶ ସ୍ୱଚ୍ଛ ରହିଲେ ମନ ସ୍ୱଚ୍ଛ ରହିବ ଓ ଶରୀର ମଧ୍ୟ ସୁସ୍ଥ ରହିବ । ତେଣୁ ସଫେଇ କାର୍ଯ୍ୟକ୍ରମକୁ ନେଇ ଲୋକମାନେ ସଚେତନ ହୋଇଥିବା ବେଳେ ଏଥିରେ ସହଯୋଗ କରିବା ଉଚିତ୍ ବୋଲି ପୁରୀ ବିଧାୟକ କହିଛନ୍ତି । ତେବେ ବନ୍ଦେ ଭାରତ ଏକ୍ସପ୍ରେସକୁ ମାତ୍ର 14 ମିନିଟରେ ସଫେଇ କରାଯାଇ ଏକ ସୁନ୍ଦର ବାର୍ତ୍ତା ଦିଆଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଦକ୍ଷେପକୁ ସେ ସ୍ଵାଗତ କରିଛନ୍ତି । ଅନ୍ୟପକ୍ଷେ ଖୁବ କମ୍ ସମୟରେ ବନ୍ଦେ ଭାରତର ସଫେଇକୁ ନେଇ ପ୍ରାଶଂସା କରିଛନ୍ତି ଯାତ୍ରୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ଵଚ୍ଚ ଭାରତ କାର୍ଯ୍ୟକ୍ରମ ଦ୍ଵାରା ଲୋକ ମାନେ ବହୁତ୍ ସଚେତନ ହେଲେଣି । ସ୍ୱଚ୍ଛତା ହିଁ ଆଗକୁ ନେବା ପାଇଁ ରାସ୍ତା ବୋଲି ଯାତ୍ରୀମାନେ କହିଛନ୍ତି ।
ଇଟିଭି ଭାରତ, ପୁରୀ
