ପୁରୀ: କୋଭିଡ କଟକଣା ପାଇଁ ଭକ୍ତଙ୍କୁ ଶ୍ରୀମନ୍ଦିର ପ୍ରବେଶକୁ ବାରଣ କରାଯାଇଛି । ଏପରିକି ଅରୁଣ ସ୍ତମ୍ଭ ସ୍ପର୍ଶ କରିବା ନେଇ ମଧ୍ୟ କଟକଣା ରହିଛି । ତେବେ ଏହି ନିୟମକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉଲ୍ଲଂଘନ କରିଥିବା ପୁରୀ ଯୁବ କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି ।
ଶୁକ୍ରବାର ଶ୍ରୀମନ୍ଦିର ସିଂହ ଦ୍ୱାର ନିକଟକୁ ଯାଇ ଅରୁଣ ସ୍ତମ୍ଭ ସ୍ପର୍ଶ କରି ମହାପ୍ରଭୁଙ୍କ ଦର୍ଶନ କରିଥିଲେ । ଏହାର ପ୍ରତିବାଦରେ ପୁରୀ ଯୁବ କଂଗ୍ରେସ ଶାଖା ପକ୍ଷରୁ ପ୍ରତିବାଦ କରାଯାଇଛି ।
ନିୟମ ସମସ୍ତଙ୍କ ପାଇଁ ହୋଇଥିବାବେଳେ ରାଜନେତା ଓ ବଡ଼ ବଡ଼ିଆଙ୍କ ପାଇଁ କଣ ଅଲଗା ନିୟମ ଅଛି କି ବୋଲି ଯୁବ କଂଗ୍ରେସ ନେତା ଆଲୋକ କୁମାର ଦାସ ପ୍ରଶ୍ନ କରିଛନ୍ତି । ପ୍ରତିବାଦରେ ପୁରୀ ଯୁବ କଂଗ୍ରେସ କର୍ମୀମାନେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବିରୋଧରେ ନାରାବାଜି କରିଛନ୍ତି ।
ସେହିପରି ବଡ଼ ଦାଣ୍ଡ ମଝିରେ ଅସ୍ଥାୟୀ ବ୍ୟାରିକେଡ ଥିବା ଯୋଗୁ ରାସ୍ତା ସଂକୀର୍ଣ୍ଣ ଯୋଗୁଁ ଲୋକେ ଯାତାୟାତରେ ଅସୁବିଧା ଭୋଗୁଛନ୍ତି। ସେଥିପାଇଁ ବ୍ୟାରିକେଡକୁ ଏମାର ମଠ ଥିବା ସ୍ଥାନରେ ନିର୍ମାଣ କରିବାକୁ ଯୁବ କଂଗ୍ରେସ ନେତା ଆଲୋକ ଦାସ ଦାବି କରିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
