ପୁରୀ: ଶ୍ରୀମନ୍ଦିର ଚତୁଃପାର୍ଶ୍ବ 75 ମିଟର ସୁରକ୍ଷା ଜୋନ ଅଞ୍ଚଳରୁ ଏଯାବତ 55ଟି ପ୍ଲଟକୁ ଅଧିଗ୍ରହଣ କରିସାରିଛି ଜିଲ୍ଲା ପ୍ରଶାସନ। 185ଟି ପ୍ଲଟ ଏହି ଅଞ୍ଚଳରେ ଥିବାବେଳେ ଅନ୍ୟ ପ୍ଲଟ ଗୁଡ଼ିକ ମଧ୍ୟ ଖୁବଶୀଘ୍ର ଅଧିଗ୍ରହଣ କରାଯିବ ବୋଲି କହିଛନ୍ତି ଜିଲ୍ଲାପାଳ।
ତେବେ ଆସନ୍ତା ଡ଼ିସେମ୍ବର 2 ତାରିଖ ମଧ୍ୟରେ ଯେଉଁମାନେ ଜମି ବିକିବେ ସେମାନଙ୍କୁ ଅଧିକ 10 ପ୍ରତିଶତ ଅର୍ଥ ଦିଆଯିବ। ଏଣୁ ଯେଉଁମାନେ ଏହି ସ୍କିମର ସୁବିଧା ନେବାକୁ ଚାହୁଁଛନ୍ତି ସେମାନେ 2 ତାରିଖ ସନ୍ଧ୍ୟା ସୁଦ୍ଧା ଜମି ବିକ୍ରୟ କରିପାରିବେ ବୋଲି ଜିଲ୍ଲାପାଳ ସୂଚନା ଦେଇଛନ୍ତି । ପୂର୍ବରୁ ଏହି ଅବଧି ଡ଼ିସେମ୍ବର 4 ତାରିଖ ଥିବାବେଳେ ଏବେ ଏହା ଡ଼ିସେମ୍ବର 2 ତାରିଖ ମଧ୍ୟରେ ହେବ ବୋଲି ଜଣାପଡ଼ିଛି ।
ଏହି ଅଞ୍ଚଳରେ ଥିବା ମଠ ଗୁଡ଼ିକର ପୁନଃନିବାସ ପାଇଁ ଜିଲ୍ଲାପ୍ରଶାସନ ପକ୍ଷରୁ ମଧ୍ୟ ଉଦ୍ୟମ କରାଯିବ । ତେବେ ମଠ ଗୁଡ଼ିକର ସ୍ଥାବର ସମ୍ପତ୍ତି ଶ୍ରୀମନ୍ଦିରର ହୋଇଥିବାରୁ ଏବାବଦରେ ଅର୍ଥ ଶ୍ରୀମନ୍ଦିର ପ୍ରଶାସନକୁ ଯିବ । ତେବେ ମଠର ନିର୍ମାଣ କୋଠା, ଦୋକାନ ଘର, ବ୍ୟବସାୟିକ ପ୍ରତିଷ୍ଠାନ ଗୁଡ଼ିକ ପାଇଁ କ୍ଷତିପୂରଣ ଦିଆଯାଇ ଏହାର ପୁନଃନିର୍ମାଣ ହେବ ବୋଲି ଜିଲ୍ଲାପାଳ କହିଛନ୍ତି। ତେବେ ପ୍ରଶାସନ ସହ ଆଲୋଚନା ମାଧ୍ୟମରେ ମଠ ଜମି ଅଧିଗ୍ରହଣ ସଂପର୍କିତ ସମସ୍ତ କାର୍ଯ୍ୟ କରାଯିବ। ସେପଟେ ମଠର ଥଇଥାନ ନେଇ ପ୍ରଶାସନ ଉଦ୍ୟମ କରୁ ବୋଲି ମଠାଧୀଶ ମାନେ କହିଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
