କ୍ରୀଡା କ୍ଷେତ୍ରରେ ସ୍ବତନ୍ତ୍ର ସ୍ଥାନ ପାଇବ ପୁରୀ, ଉଦଘାଟନ ହେବ ଶ୍ରୀ ଜଗନ୍ନାଥ କ୍ରିକେଟ ଷ୍ଟାଡିୟମ

କ୍ରୀଡ଼ା କ୍ଷେତ୍ରରେ ଏକ ସ୍ବତନ୍ତ୍ର ସ୍ଥାନ ପାଇବାକୁ ଯାଉଛି ପୁରୀ । ଖୁବଶୀଘ୍ର ଉଦଘାଟନ ହେବ ଶ୍ରୀ ଜଗନ୍ନାଥ କ୍ରିକେଟ ଷ୍ଟାଡିୟମ । ଅଧିକ ପଢନ୍ତୁ

ପୁରୀ: କ୍ରୀଡା କ୍ଷେତ୍ରରେ ସଫଳତା ସାଉଁଟୁଛି ଓଡିଶା । କ୍ରୀଡା ପାଇଁ ଯୁବଗୋଷ୍ଠୀ ଭବିଷ୍ୟତ ପାଇଁ ବଡ ଶକ୍ତିକୁ ସଫଳ କରିବା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି ରାଜ୍ୟ ସରକାର । ଆଗକୁ କ୍ରୀଡା କ୍ଷେତ୍ରରେ ପୁରୀ ସ୍ଵତନ୍ତ୍ର ସ୍ଥାନ ପାଇବାକୁ ଯାଉଛି । ଖୁବ ଶୀଘ୍ର ପୁରୀରେ ଶ୍ରୀ ଜଗନ୍ନାଥ କ୍ରିକେଟ ଷ୍ଟାଡିୟମ ଉଦଘାଟନ କରିବେ ମୁଖ୍ୟମନ୍ତ୍ରୀ । ଯୁଦ୍ଧକାଳୀନ ଭିତ୍ତିରେ ଷ୍ଟାଡିୟମ କାର୍ଯ୍ୟ ଜାରି ରହିଛି ।

ଶ୍ରୀକ୍ଷେତ୍ରବାସୀଙ୍କର ଦୀର୍ଘ ଦିନର ଆଶା ପୂରଣ ହେବାକୁ ଯାଉଛି । ଖୁବଶୀଘ୍ର ଲୋକାର୍ପିତ ହେବାକୁ ଯାଉଛି ପୁରୀ ପେଣ୍ଠକଟା ଠାରେ ନିର୍ମାଣ ହୋଇଥିବା ଶ୍ରୀ ଜଗନ୍ନାଥ ଷ୍ଟାଡିଅମ ତଥା କ୍ରୀଡ଼ା କମ୍ପ୍ଲେକ୍ସ । ଶ୍ରୀ ଜଗନ୍ନାଥ ଷ୍ଟାଡିୟମରେ ଅତ୍ୟାଧୁନିକ କ୍ରିକେଟ ଷ୍ଟାଡିୟମ, ଇଣ୍ଡୋର ହଲ୍ ଏବଂ ସୁଇମିଙ୍ଗ ପୁଲ୍ ନିର୍ମାଣ କରାଯାଇଛି । ଇଣ୍ଡୋର ହଲରେ ବକ୍ସିଙ୍ଗ, ରେସଲିଙ୍ଗ, ଜିମ୍ନାସିୟମ ଓ ଟେବୁଲ୍ ଟେନିସ୍ ଆଦି କ୍ରୀଡ଼ାର ସୁବିଧା ଉପଲବ୍ଧ ହେବ ।‌ ଏଥି ସହିତ 100 ସିଟ୍ ବିଶିଷ୍ଟ ସ୍ପୋର୍ଟସ ହଷ୍ଟେଲ ମଧ୍ୟ‌ ନିର୍ମାଣ କରାଯାଇଛି । ପୂର୍ବରୁ ପୁରୀ ସହରରେ ଏକ ଭଲ ଷ୍ଟାଡିୟମ ନଥିବାରୁ ଅନେକ କ୍ରୀଡ଼ାବିତ୍ ଭଲ ଅଭ୍ୟାସ ପାଇଁ ସୁଯୋଗ ପାଉନଥିଲେ । ମୁଖ୍ୟମନ୍ତ୍ରୀ କ୍ରୀଡାବିତଙ୍କ ଏହି ସମସ୍ୟା ସମାଧାନ ପାଇଁ ଏକ ଅତ୍ୟାଧୁନିକ ଷ୍ଟାଡିୟମ ଲୋକାର୍ପଣ କରିବାକୁ ଯାଉଥିବାରୁ ଏହାକୁ ସବୁ ମହଲରେ ସ୍ବାଗତ କରାଯାଇଛି ।

ଗତ ୨୦୧୮ ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଷ୍ଟାଡିୟମର ଶିଳାନ୍ୟାସ କରିଥିଲେ । ପାଖାପାଖି ୧୪ ଏକର ଜମିରେ ୬୭ କୋଟି ଟଙ୍କା ଅଧିକ ଅର୍ଥ ବ୍ୟୟରେ ଏହି ଷ୍ଟାଡିୟମ ନିର୍ମାଣ କରାଯାଉଛି । କ୍ରିକେଟ ଷ୍ଟାଡିୟମରେ ରଣଜୀ ଟ୍ରଫି ଭଳି ଫାଷ୍ଟ କ୍ଲାସ କ୍ରିକେଟ ଟୁର୍ଣ୍ଣାମେଣ୍ଟ ଅନୁଷ୍ଠିତ ହେବ । ଦୁଇ ହଜାର ଦର୍ଶକ ଖେଳକୁ ଉପଭୋଗ କଲା ଭଳି ସୁନ୍ଦର ପାଭିଲିଅନ୍ ମଧ୍ୟ ରହିଛି । ସେହିପରି କ୍ରିକେଟ ଏକାଡେମୀର ବ୍ୟବସ୍ଥା କରାଯାଇଥିବା ବେଳେ ଏଥିରେ ଓଡ଼ିଶାର ଦକ୍ଷ ଖେଳାଳିମାନେ ଏହିଠାରେ ଅଭ୍ୟାସ କରିବେ । ତେବେ ମୁଖ୍ୟମନ୍ତ୍ରୀଙ୍କ ଏଭଳି ପଦକ୍ଷେପକୁ ପୁରୀର କ୍ରୀଡା ସଂଗଠକ ଓ କ୍ରୀଡାବିତ୍ ମାନେ ପ୍ରଶଂସା କରିଛନ୍ତି । ଏହି କ୍ରିକେଟ ଷ୍ଟାଡିୟମ ପୁରୀକୁ କ୍ରୀଡ଼ା କ୍ଷେତ୍ରରେ ଏକ ସ୍ବତନ୍ତ୍ର ସ୍ଥାନ ଦେବ ବୋଲି କହିଛନ୍ତି ଜିଲ୍ଲାପାଳ ।‌

ପୁରୀକୁ ବିଶ୍ବସ୍ତରୀୟ ଐତିହ୍ୟ ନଗରୀ କରିବା ପାଇଁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପ୍ରକଳ୍ପ କାର୍ଯ୍ୟ ଚାଲୁ ରହିଛି । ତେବେ ଶ୍ରୀ ଜଗନ୍ନାଥ ଷ୍ଟାଡିୟମ ଲୋକାର୍ପିତ ପରେ ପୁରୀ ସହର କ୍ରିଡ଼ାକ୍ଷେତ୍ରରେ ଏକ ସ୍ଵତନ୍ତ୍ର ସ୍ଥାନ ହାସଲ କରିବ ବୋଲି ଆଶା କରାଯାଉଛି ।‌ ଷ୍ଟାଡିୟମର ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ନିକଟରେ 5ଟି ସଚିବ ଭିକେ ପାଣ୍ଡିଆନ ପୁରୀ ଗସ୍ତ କରି ଷ୍ଟାଡିୟମ କାର୍ଯ୍ୟ ସମୀକ୍ଷା କରିଥିଲେ ।

ଇଟିିଭି ଭାରତ, ପୁରୀ